काठमाडौं । ऊर्जा, जलस्रोत तथा सिँचाइ मन्त्री विराज भक्त श्रेष्ठले विद्युत् ट्रान्सफर्मर तथा अर्थिङका तामाका तार चोरीका घटनालाई राष्ट्रिय सम्पत्तिमाथिको गम्भीर आक्रमण भएको भन्दै यसको नियन्त्रणका लागि सरकार, सुरक्षा निकाय, स्थानीय तह, सञ्चारमाध्यम र नागरिक सबैको साझा पहल आवश्यक रहेको बताएका छन्।
मन्त्री श्रेष्ठले ट्रान्सफर्मर चोरी वा अर्थिङका तामाका तार काट्ने कार्यले केही व्यक्तिलाई क्षणिक लाभ पुगे पनि त्यसको ठूलो मूल्य सम्पूर्ण देशले चुकाउनुपर्ने अवस्था सिर्जना भएको उल्लेख गरेका छन्।
उनका अनुसार यस्ता घटनाले सबैभन्दा बढी असर किसानलाई पर्ने गरेको छ। डिप बोरिङमार्फत हुने सिँचाइ अवरुद्ध हुँदा खेतीपाती प्रभावित हुने, उत्पादन घट्ने र त्यसको असर खाद्य सुरक्षा तथा राष्ट्रिय अर्थतन्त्रसम्म पुग्ने उनले बताएका छन्।
मन्त्री श्रेष्ठले विद्युत् पूर्वाधारमा हुने चोरीले विद्युत् प्रणाली असन्तुलित हुने, लाइन ट्रिप हुने, उपकरणमा क्षति पुग्ने, विद्युत् आपूर्ति अवरुद्ध हुने तथा मर्मतमा ठूलो सार्वजनिक खर्च लाग्ने अवस्था सिर्जना हुने उल्लेख गरे। अन्ततः यस्तो क्षतिको भार जनताले तिरेको करबाट व्यहोर्नुपर्ने उनले स्पष्ट पारे।
“यो केवल तामा वा ट्रान्सफर्मरको चोरी मात्र होइन, किसानको पसिनामाथिको प्रहार, जनताको करबाट बनेको राष्ट्रिय सम्पत्तिमाथिको आक्रमण र देशको विकास तथा अर्थतन्त्रमाथिको क्षति हो,” मन्त्री श्रेष्ठको भनाइ छ।
विद्युत् पूर्वाधारको सुरक्षा नेपाल विद्युत् प्राधिकरणको मात्र जिम्मेवारी नभएको उल्लेख गर्दै उनले यसको समाधानका लागि सबै पक्षबीच प्रभावकारी समन्वय आवश्यक रहेको बताए। शंकास्पद गतिविधि देखिए तत्काल प्रहरी वा सम्बन्धित निकायलाई जानकारी गराउन उनले नागरिकलाई आग्रह गरेका छन्।
मन्त्री श्रेष्ठले नागरिकको एउटा सचेत सूचनाले हजारौँ घरपरिवारलाई अन्धकारबाट बचाउन सक्ने उल्लेख गर्दै विद्युत् ट्रान्सफर्मर चोरी तथा विद्युत् पूर्वाधारमा हुने तोडफोड नियन्त्रणका लागि कडा निगरानी, कानुनी कारबाही र जनसहभागितामूलक अभियानलाई थप प्रभावकारी बनाइने संकेत दिएका छन्।
