काठमाडौं । विश्व कीर्तिमानी नेपाली पर्वतारोही निर्मल पुर्जा (निम्स दाई) को पाकिस्तानको ब्रड पिक (८,०५१ मिटर) हिमालमा आएको भीषण हिमपहिरोमा निधन भएको पुष्टि भएको छ।
निर्मल पुर्जाले स्थापना गरेको पर्वतारोहण संस्था इलाइट एक्सपेड ले सामाजिक सञ्जालमार्फत उनको निधन भएको आधिकारिक जानकारी सार्वजनिक गरेको हो। केही दिनअघि ब्रड पिक आरोहणका क्रममा आएको हिमपहिरोमा उनीसहित १० जना बेपत्ता भएका थिए।
बेपत्तामध्ये ६ जना नेपाली पर्वतारोही रहेको जनाइएको छ। खोज तथा उद्धार अभियान जारी रहेकै क्रममा शुक्रबार ४ जनाको शव फेला परेको थियो। त्यसपछि थप खोजीका क्रममा निर्मल पुर्जाको पनि मृत्यु भएको पुष्टि गरिएको हो। अन्य बेपत्ता व्यक्तिको खोजी कार्य भने अझै जारी रहेको बताइएको छ।
निर्मल पुर्जा विश्व पर्वतारोहण क्षेत्रमा सबैभन्दा चर्चित नेपालीमध्ये एक मानिन्थे। उनले सन् २०१९ मा ६ महिनाभन्दा कम समय (६ महिना ६ दिन) मा विश्वका १४ वटा ८ हजार मिटरभन्दा अग्ला हिमाल आरोहण गरेर विश्व कीर्तिमान कायम गरेका थिए। यसअघि करिब ८ वर्ष लागेको कीर्तिमान उनले तोड्दै नयाँ इतिहास रचेका थिए।
पूर्व ब्रिटिश गोर्खा सैनिक तथा यूके स्पेशल फोर्स (SBS) का सदस्यसमेत रहेका पुर्जाले नेपालको पर्वतारोहण र पर्यटनलाई विश्वमाझ चिनाउने महत्वपूर्ण भूमिका खेलेका थिए। उनको जीवनमा आधारित “14 Peaks: Nothing Is Impossible” नामक वृत्तचित्रले पनि अन्तर्राष्ट्रिय स्तरमा ठूलो चर्चा बटुलेको थियो।
उनको असामयिक निधनको खबर सार्वजनिक भएपछि नेपालसहित विश्वभरका पर्वतारोही, पर्यटन व्यवसायी तथा शुभेच्छुकहरूले गहिरो दुःख व्यक्त गर्दै श्रद्धाञ्जली अर्पण गरिरहेका छन्।
ब्रड पिकमा भएको यस दुर्घटनालाई पछिल्ला वर्षहरूकै सबैभन्दा दुःखद पर्वतारोहण दुर्घटनामध्ये एक मानिएको छ। अधिकारीहरूले मौसम अनुकूल भएपछि बाँकी बेपत्ताहरूको खोजीलाई निरन्तरता दिने बताएका छन्।
