काठमाडौं । राष्ट्रिय स्वतन्त्र पार्टी (रास्वपा)को केन्द्रीय कार्यसमिति बैठक बुधबारदेखि पार्टीको केन्द्रीय कार्यालय बनस्थलीमा सुरु भएको छ। चितवनमा सम्पन्न पार्टीको पहिलो महाधिवेशनबाट निर्वाचित केन्द्रीय समितिको यो दोस्रो औपचारिक बैठक हो।
बैठकमा महाधिवेशनपछिको समग्र संगठनात्मक अवस्थाको समीक्षा गर्ने, महाधिवेशनबाट पारित निर्णयहरूको कार्यान्वयन अवस्था मूल्याङ्कन गर्ने तथा आगामी कार्यदिशा तय गर्ने मुख्य कार्यसूची रहेको पार्टीले जनाएको छ।
त्यसैगरी, आवश्यक कार्यविधिको तर्जुमा तथा परिमार्जन, पार्टीको सांगठनिक व्यवस्थापनलाई थप प्रभावकारी बनाउने, विभिन्न तहमा आवश्यक मनोनयन गर्ने तथा आगामी अभियान र कार्यक्रम सञ्चालनबारे पनि विस्तृत छलफल हुने जनाइएको छ।
यसका साथै, देशको समसामयिक राजनीतिक घटनाक्रम, संसद् र सरकारसँग सम्बन्धित विषय तथा पार्टीको भावी रणनीतिबारे पनि बैठकमा समीक्षा हुने रास्वपाले जनाएको छ। बैठकबाट संगठन सुदृढीकरण, जनसम्पर्क विस्तार र आगामी राजनीतिक कार्यक्रमलाई प्रभावकारी ढंगले अघि बढाउने विषयमा महत्त्वपूर्ण निर्णयहरू हुने अपेक्षा गरिएको छ।
