काठमाडौं । नेपाली कांग्रेसका नेता एनपी साउदले पार्टीका पुराना नेता–कार्यकर्ताको योगदानको सम्मान नगरी कांग्रेस बलियो बन्न नसक्ने बताएका छन्।बुधबार बीपी स्मृति दिवसका अवसरमा आयोजित कार्यक्रममा बोल्दै साउदले कार्यक्रममा उपस्थित नेता–कार्यकर्तालाई लक्षित गर्दै उनीहरू ‘दास र लास नभई लोकतान्त्रिक आन्दोलनका योद्धा’ भएको बताएका हुन्।
उनले आफूले उक्त हलमा पञ्चायतविरुद्ध आन्दोलन गरेका, राजतन्त्रविरुद्ध संघर्ष गरेका तथा जेल–नेल भोगेका नेता–कार्यकर्ताको अनुहार देखिरहेको भन्दै उनीहरू नै कांग्रेसको वास्तविक भरोसा र शक्ति भएको बताए। यो हलमा बसेका अनुहार दास र लास होइनन्। यी पञ्चायत फालेका, राजा फालेका, जेल–नेल भोगेका योद्धा हुन्। यिनै अनुहार कांग्रेसका भरोसा र विश्वास हुन्,” साउदले भने।
उनले पार्टीभित्र लामो योगदान दिएका नेता–कार्यकर्तालाई पन्छाएर कांग्रेसलाई सुदृढ बनाउन नसकिने धारणा राखे। “पञ्चायत फालेकाहरू, राजा फालेकाहरू र जेल–नेल भोगेकाहरूलाई पन्छाएर कांग्रेस बलियो हुन सक्दैन,” उनले जोड दिए। साउदले पार्टीभित्र देखिएको आन्तरिक असन्तुष्टि अन्त्य गर्दै एकताको पक्षमा सबै पक्ष गम्भीर बन्नुपर्ने आवश्यकता औंल्याए। उनले विशेष गरी महामन्त्री गगन थापा पक्षले पार्टी एकताका लागि सक्रिय पहल नगरे कांग्रेस थप कमजोर हुने जोखिम रहने चेतावनी दिए।
उनका अनुसार कांग्रेसभित्रको एकता, आपसी विश्वास र अनुभवी नेता–कार्यकर्ताको सम्मानले मात्र पार्टीलाई आगामी राजनीतिक चुनौती सामना गर्न सक्षम बनाउनेछ।
