सुर्खेत । कर्णाली प्रदेशमा सत्ता समीकरण फेरिएको छ। नेपाली कांग्रेस संसदीय दलका नेता जीवनबहादुर शाही दोस्रो पटक मुख्यमन्त्री बन्ने बाटो खुलेको छ।
बिहीबार नेपाली कम्युनिस्ट पार्टी (नेकपा), कांग्रेस तथा एक स्वतन्त्रसहित १६ जना प्रदेशसभा सदस्यले मुख्यमन्त्री यामलाल कँडेलविरुद्ध अविश्वासको प्रस्ताव दर्ता गरेका छन्। प्रस्तावमा संविधानअनुसार जीवनबहादुर शाहीलाई नयाँ मुख्यमन्त्रीका रूपमा प्रस्ताव गरिएको छ।
यसअघि एमाले नेतृत्वको सरकारमा सहभागी कांग्रेसले आफ्ना चार मन्त्रीलाई फिर्ता बोलाएको थियो। कांग्रेसका प्रमुख सचेतक हिक्मतबहादुर विष्टका अनुसार सरकार अल्पमतमा परेपछि मुख्यमन्त्रीले राजीनामा दिने अपेक्षा गरिएको थियो। तर राजीनामा नआएपछि अविश्वासको प्रस्ताव दर्ता गर्नुपरेको उनले बताए।
यद्यपि, कांग्रेसले नेकपासँग अहिलेसम्म औपचारिक सत्ता साझेदारीको कुनै सहमति नभएको दाबी गरेको छ। अब अविश्वास प्रस्तावमाथि प्रदेशसभामा हुने छलफल र मतदानपछि कर्णाली प्रदेशको नयाँ सरकार गठन प्रक्रिया अघि बढ्नेछ।
