काठमाडौं । प्रेम आचार्य आत्मदाह प्रकरणमा तत्कालीन राज्य नेतृत्वमाथि प्रश्न उठाएका बालेन्द्र शाह (बालेन) अहिले आफैं सरकारको नेतृत्वमा छन्। तर काठमाडौं महानगरपालिकासँग जोडिएको गणेश नेपाली प्रकरणमा भने प्रधानमन्त्री बालेन शाहको मौनतामाथि प्रश्न उठ्न थालेको छ।
बानेश्वरस्थित संसद् भवन अगाडि प्रेम आचार्यले गरेको आत्मदाह घटनापछि तत्कालीन समयमा काठमाडौं महानगरपालिकाका मेयर रहेका बालेनले सामाजिक सञ्जालमार्फत राज्य व्यवस्था र नेतृत्वमाथि कडा टिप्पणी गरेका थिए। उनको अभिव्यक्तिले ठूलो समर्थन पाएको थियो भने धेरैले उनलाई जवाफदेही र नयाँ पुस्ताको नेतृत्वका रूपमा हेरेका थिए।
तर अहिले परिस्थिति बदलिएको छ। प्रधानमन्त्रीको जिम्मेवारीमा पुगेका बालेनमाथि नै नागरिकले प्रश्न गर्न थालेका छन्। काठमाडौं महानगरपालिकासँग जोडिएको विवादपछि गणेश नेपालीले आत्मदाहको प्रयास गरेको र उपचारका क्रममा उनको निधन भएको घटनामा प्रधानमन्त्रीको तर्फबाट कुनै सार्वजनिक प्रतिक्रिया नआएको भन्दै आलोचना बढेको हो।
गणेश नेपालीको घटना महानगरपालिकाको अभियान तथा कारबाही प्रक्रियासँग जोडिएको विवादबाट सुरु भएको बताइएको छ। महानगरको निर्णय प्रक्रिया, नागरिकसँगको व्यवहार र समस्या समाधान गर्ने शैलीमाथि प्रश्न उठाउँदै पीडित पक्ष तथा सामाजिक सञ्जाल प्रयोगकर्ताहरूले छानबिनको माग गरेका छन्।
पछिल्लो समय सरकारले ट्राफिक नियम उल्लंघन नियन्त्रणका लागि जरिवाना रकम र कारबाही प्रक्रियामा गरेको कडाइप्रति पनि केही नागरिकले असन्तुष्टि जनाउँदै आएका छन्। दैनिक ज्याला मजदुरी गरेर जीवनयापन गर्ने सर्वसाधारणलाई असर पर्ने गरी नीति तथा कानुन कार्यान्वयन गर्दा मानवीय पक्षलाई समेत ध्यान दिनुपर्ने आवाज उठिरहेको छ।
कतिपय आलोचकहरूले कडा कानुनी व्यवस्था र जरिवाना प्रणालीले कमजोर आर्थिक अवस्थाका नागरिकलाई थप दबाबमा पार्न सक्ने भन्दै राज्यको नीति नागरिकमैत्री हुनुपर्ने बताएका छन्। यस्ता घटनाले सरकार र स्थानीय तहले नागरिकका गुनासा सुन्ने तथा समस्या समाधान गर्ने संयन्त्र अझ प्रभावकारी बनाउनुपर्ने आवश्यकता देखाएको उनीहरूको भनाइ छ।
आलोचकहरूले महानगर र राज्य संयन्त्रले नागरिकको पीडा र गुनासोलाई समयमै सम्बोधन गर्न नसकेको आरोप लगाएका छन्। केहीले महानगरलाई मात्र दोष देखाएर राज्य पक्ष आफ्नो जिम्मेवारीबाट पन्छिन खोजेको टिप्पणीसमेत गरेका छन्।
प्रेम आचार्य प्रकरणमा तत्कालीन नेतृत्वमाथि प्रश्न उठाएका बालेन अहिले आफैं निर्णय गर्ने स्थानमा पुगेका छन्। तर गणेश नेपालीको निधनपछि २४ घण्टासम्म पनि प्रधानमन्त्रीको तर्फबाट कुनै धारणा सार्वजनिक नभएपछि “हिजो प्रश्न गर्ने बालेन आज जवाफ दिने ठाउँमा पुग्दा किन मौन ?” भन्ने प्रश्न उठ्न थालेको छ।
नयाँ राजनीतिक नेतृत्वबाट सुशासन, पारदर्शिता र नागरिकप्रति संवेदनशील व्यवहारको अपेक्षा गरिरहेका जनतामा पछिल्लो घटनाले थप निराशा पैदा गरेको टिप्पणी हुन थालेको छ।
