चितवन । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत ९९ जना केन्द्रीय सदस्य चयनका लागि करिब ४ सय जनाले उम्मेदवारी दर्ता गराएका छन्। निर्वाचन आयोगका प्रमुख भुवन केसीका अनुसार उम्मेदवारहरूको अन्तिम संख्या यकिन गर्न सूची तयार पार्ने काम भइरहेको छ।
‘केन्द्रीय सदस्य पदका लागि करिब चार सय जनाको मनोनयन दर्ता भएको छ। दर्ता भएका उम्मेदवारको यकिन संख्या निर्धारण गर्ने काम भइरहेको छ,’ प्रमुख केसीले जानकारी दिए।
उनका अनुसार बिहान ९ बजेदेखि मतदान सुरु गर्ने कार्यतालिका भए पनि उम्मेदवारहरूको प्रारम्भिक सूची तयार गर्नुपर्ने भएकाले मतदान प्रक्रिया बिहान साढे १० बजेतिर मात्रै सुरु हुने तयारी गरिएको छ। मतदानका लागि ८० वटा इलेक्ट्रोनिक भोटिङ मेसिनको व्यवस्था गरिएको छ। एक प्रतिनिधिले मतदान गर्न १५ देखि २० मिनेट लाग्ने अनुमान गरिएको छ भने मतदान सम्पन्न भएको करिब एक घण्टाभित्रै नतिजा सार्वजनिक गर्न सकिने निर्वाचन आयोगको दाबी छ।
रास्वपाको सभापति पदमा भने रवि लामिछाने यसअघि नै निर्विरोध निर्वाचित भइसकेका छन्। अब केन्द्रीय सदस्यहरूको निर्वाचन सम्पन्न भएपछि पदाधिकारी चयनको प्रक्रिया अघि बढाइनेछ। पार्टी विधानअनुसार सभापति र केन्द्रीय सदस्यहरूको टुंगो लागेपछि मात्रै महाधिवेशन प्रतिनिधिहरूले पदाधिकारी चयन गर्ने व्यवस्था रहेको छ।
पार्टीले केन्द्रीय सदस्य र पदाधिकारी दुवै पदको मतदान तथा नतिजा सार्वजनिक गर्ने काम आजै सम्पन्न गर्ने लक्ष्य लिएको छ।
असार ७ गतेदेखि चितवनमा सुरु भएको रास्वपाको पहिलो महाधिवेशन असार ९ गतेभित्रै सम्पन्न गर्ने तयारी भए पनि प्रतिनिधि छनोटसम्बन्धी प्राविधिक जटिलताका कारण कार्यक्रम केही दिन लम्बिएको हो।
महाधिवेशनमा करिब चार हजार प्रतिनिधिको सहभागिता रहेको छ। रास्वपाको विधानअनुसार १९ पदाधिकारीसहित १५१ सदस्यीय केन्द्रीय समिति रहने व्यवस्था छ। जसमध्ये ९९ जना केन्द्रीय सदस्य निर्वाचनमार्फत चयन हुनेछन् भने बाँकी ५१ जनालाई सभापतिले मनोनीत गर्ने प्रावधान रहेको छ।
