काठमाण्डौ। महोत्तरी जिल्लाको बर्दिवासमा विद्यालय शिक्षाको गुणस्तर सुधार, प्रभावकारी योजना कार्यान्वयन तथा स्थानीय तहबीच समन्वय सुदृढ गर्ने उद्देश्यले “विद्यालय शिक्षा क्षेत्र योजना (SESP) सहजीकरण अन्तरक्रिया कार्यक्रम” सम्पन्न भएको छ। नेपाल नगरपालिका संघ तथा शिक्षा तथा मानव स्रोत विकास केन्द्र को संयुक्त आयोजनामा सम्पन्न कार्यक्रममा मधेश प्रदेशभरिका नगरपालिकाका नगरप्रमुख, उपप्रमुख तथा शिक्षा शाखा प्रमुखहरूको उल्लेखनीय सहभागिता रहेको थियो।
कार्यक्रमको सभापतित्व संघका केन्द्रिय सदस्य तथा बरथवा नगरपालिका नगरप्रमुख कल्पना कटुवाल ले गर्नुभएको थियो भने प्रमुख अतिथिको रुपमा जनकपुरधाम उपमहानगरपालिका नगरप्रमुख मनोज कुमार साह को उपस्थिति रहेको थियो। कार्यक्रमबारे समक्षिप्त जानकारी दिँदै कलानिधि देवकोटा ले विद्यालय शिक्षा क्षेत्र योजना (SESP) कार्यान्वयनमा स्थानीय तहको भूमिका महत्वपूर्ण रहेको बताउनुभयो। उहाँले सामुदायिक विद्यालयको शैक्षिक गुणस्तर सुधार, शिक्षक व्यवस्थापन, डिजिटल शिक्षाको विस्तार तथा विद्यार्थीको सिकाइ उपलब्धि वृद्धि गर्न स्थानीय सरकारबीच समन्वय आवश्यक रहेको धारणा राख्नुभयो।
कार्यक्रममा सहभागी जनप्रतिनिधि तथा शिक्षा शाखा प्रमुखहरूले विद्यालय शिक्षा सुधारका लागि नीति, योजना र व्यवहारिक कार्यान्वयनबीच प्रभावकारी समन्वय हुनुपर्नेमा जोड दिएका थिए। उनीहरूले शिक्षामा समान पहुँच, विद्यालय पूर्वाधार विकास, प्रविधिमैत्री शिक्षण प्रणाली तथा बालबालिकाको नियमित उपस्थितिलाई प्राथमिकतामा राख्नुपर्ने बताएका थिए। कार्यक्रमले मधेश प्रदेशमा विद्यालय शिक्षालाई थप व्यवस्थित, गुणस्तरीय र विद्यार्थीमैत्री बनाउने दिशामा महत्वपूर्ण सन्देश दिएको सहभागीहरूको भनाइ रहेको छ।
