मधेश प्रदेश अन्तर्गत धनुषा जिल्लाको क्षीरेश्वरनाथ नगरपालिका मा “संवाद एक्सप्रेस” कार्यक्रम सम्पन्न भएको छ। न्युज एक्सप्रेस मिडिया प्रा.लि. द्वारा सञ्चालित ७५३ पालिका लक्षित कार्यक्रमअन्तर्गत मधेश प्रदेशबाट सुरु गरिएको यो अभियान धनुषाका विभिन्न स्थानीय तहमा पुग्ने क्रममा क्षीरेश्वरनाथ नगरपालिकामा सम्पन्न भएको हो।
धनुषा जिल्लामा अवस्थित क्षीरेश्वरनाथ नगरपालिका साविकका ५ वटा गाविस समायोजन गरी गठन गरिएको स्थानीय तह हो। हाल यस नगरपालिकाले ११ वटा वडामार्फत नागरिकलाई सेवा सुविधा प्रदान गर्दै आएको छ। २०६८ सालको जनगणनाअनुसार नगरपालिकाको कुल जनसंख्या ४८,८१३ रहेको छ, जसमा पुरुष २४,७७२ र महिला २४,०४१ रहेका छन्।
कार्यक्रममा नगर प्रमुख सुखदेव यादव, प्रमुख प्रशासकीय अधिकृतका तर्फबाट राम बहादुर यादव, विभिन्न वडा अध्यक्षहरू तथा स्थानीय सर्वसाधारणको उल्लेखनीय उपस्थिति रहेको थियो। कार्यक्रममा स्थानीय तहलाई कसरी अझ प्रभावकारी, जनमुखी र उत्तरदायी बनाउन सकिन्छ भन्ने विषयमा गहन छलफल गरिएको थियो। विशेषगरी शिक्षा, स्वास्थ्य, रोजगारी, सेवा प्रवाह तथा विकास निर्माणलाई कसरी चुस्तदुरुस्त बनाउने भन्ने विषय मुख्य बहसको केन्द्र बनेको थियो।
कार्यक्रममा बोल्दै नगर प्रमुख सुखदेव यादवले नयाँ सरकारको नीति र कार्यशैलीप्रति असन्तुष्टि व्यक्त गरेका थिए। उनले पुराना सबै भ्रष्ट र असफल भन्ने भाष्यप्रति आपत्ति जनाउँदै यदि सरकारले २०४६ सालपछि सार्वजनिक पद धारण गरेका व्यक्तिहरूको सम्पत्ति छानबिन गर्ने अभियान अघि बढाउँछ भने आफूबाटै सुरु गर्न चुनौती दिएको बताएका छन्।
साथै उनले आफ्नो कार्यकालमा अघिल्ला जनप्रतिनिधिहरूको तुलनामा स्थानीय विकासका क्षेत्रमा बढी काम भएको दाबी गरेका थिए।
कार्यक्रममा सहभागी वडा अध्यक्षहरूले आफ्नो कार्यकालमा सम्पन्न भएका विकास निर्माण तथा जनसेवा सम्बन्धी कामको चर्चा गरेका थिए। उनीहरूले अपेक्षाअनुसार काम गर्न नसक्नुका कारण बजेट, प्रक्रिया तथा विभिन्न प्रशासनिक चुनौती रहेको उल्लेख गरे।
त्यसैगरी प्रमुख प्रशासकीय अधिकृतका तर्फबाट बोल्दै राम बहादुर यादवले नगरको विकासका लागि आफू प्रतिबद्ध रहेको र स्थानीय तहमा देखिएको भ्रष्टाचार नियन्त्रणका लागि खुलेर लाग्ने बताएका थिए। पछिल्लो समय नगर प्रमुख र प्रशासकीय नेतृत्वबीच देखिएको असमझदारी तथा शक्ति सन्तुलनको विषयमा समेत कार्यक्रममा खुला छलफल भएको थियो।
कार्यक्रमको अर्को विशेषता स्थानीय नागरिकको सक्रिय सहभागिता रह्यो। कार्यक्रममा उपस्थित सर्वसाधारणले स्थानीय तहमा देखिएका समस्या, सेवा प्रवाहको ढिलासुस्ती, विकास निर्माण, शिक्षा, स्वास्थ्य तथा रोजगारी सम्बन्धी प्रश्न आफ्ना जनप्रतिनिधिसमक्ष प्रत्यक्ष राखेका थिए। ती प्रश्नको जवाफ नगर प्रमुख, वडा अध्यक्ष तथा सम्बन्धित प्रतिनिधिहरूले दिएका थिए। कार्यक्रम सञ्चालन उमेश सुनारले गरेका थिए भने कार्यक्रमका प्रोड्युसर प्रतिक श्रेष्ठ रहेका थिए।
न्युज एक्सप्रेसका सञ्चालक तथा कार्यक्रमको सम्पूर्ण जिम्मेवारी सम्हाल्दै आएकी मिना सिंहका अनुसार संवाद एक्सप्रेस को मुख्य उद्देश्य स्थानीय तहलाई अझ प्रभावकारी, पारदर्शी र जनमुखी बनाउनु हो। स्थानीय तहमा देखिएका समस्या जनतामाझ ल्याउने र समाधानका उपाय खोज्ने उद्देश्यले कार्यक्रम सञ्चालन गरिएको उनले बताइन्।
