सरकारले सुन खरीदमा लगाएको बिलासिता करका कारण सुनचाँदी व्यवसाय गम्भीर संकटमा परेको बताएका छन्। पछिल्लो समय लागू गरिएको कर नीतिले बजार सुस्त बनाउनुका साथै व्यवसाय नै धराशायी हुने अवस्था सिर्जना गरेको छ।
जनकपुरधामका सुनचाँदी व्यवसायीहरूले सरकारको कर नीतिप्रति असन्तुष्टि व्यक्त गरेका हुन्। महासंघका धनुषा जिल्ला अध्यक्ष दिपेन्द्र ठाकुर ले बिलासिता करकै कारण ग्राहकको खरीद क्षमता घटेको र व्यापार दैनिक रूपमा कमजोर बन्दै गएको बताए।
सुनचाँदी कुनै विलासिताको वस्तु मात्र नभई नेपाली समाजको संस्कृति, परम्परा र आवश्यकतासँग जोडिएको विषय हो। विवाह, व्रतबन्ध, धार्मिक अनुष्ठान तथा विभिन्न सामाजिक कार्यमा सुनचाँदीको प्रयोग अनिवार्यजस्तै भएकाले यसलाई विलासिताको रूपमा हेर्नु गलत भएको व्यवसायीहरूको तर्क छ।
अध्यक्ष ठाकुरले सरकारले लगाएको अतिरिक्त करका कारण सुनको मूल्य झन् महँगो बनेपछि ग्राहकहरू बजार आउन छाडेको बताए।
जनकपुरधामका केही व्यवसायीहरूले बैंकमार्फत सुन खरीद गर्नसमेत कठिनाइ भइरहेको गुनासो गरेका छन्। बजारमा कारोबार घटेपछि कर्मचारी कटौती गर्ने अवस्था आउन थालेको र साना व्यवसायीहरू झन् बढी प्रभावित बनेको उनीहरूको भनाइ छ।
व्यवसायीहरूले सरकारसँग तत्काल बिलासिता कर पुनर्विचार गर्न माग गरेका छन्। यदि कर नीति सच्याइएन भने देशभरका सुनचाँदी व्यवसायी आन्दोलनमा उत्रिन बाध्य हुने चेतावनीसमेत दिएका छन्। कर नीति बनाउँदा बजारको वास्तविक अवस्था, उपभोक्ताको क्षमता र व्यवसायको संवेदनशीलतालाई ध्यान दिनुपर्ने बताएका छन्। सुनचाँदी व्यवसाय नेपालको अर्थतन्त्रसँग प्रत्यक्ष जोडिएको क्षेत्र भएकाले अत्यधिक करले दीर्घकालीन नकारात्मक असर पार्न सक्ने उनीहरूको भनाइ छ।
