काठमाडौँ । रौतहटको बौद्धिमाइ नगरपालिका वडा नम्बर ८ सरमुजवास्थित शंकर माध्यमिक बिद्यालयमा कार्यरत शिक्षक रामबाबु यादवलाइ कुटपिट गरेको प्रकरणमा शिक्षकहरू आन्दोलित भएका छन् । विद्यालयमा पढाइरहेका बेला नगर शिक्षा संयोजक रमेश यादवले फोन गरेर नगरपालिकामा बोलाएको भन्दै नगरपालिका जाँदा नगर प्रमुख प्रदीप यादवले कार्यकक्षमै शिक्षकलाई कुटेका हुन् ।
शिक्षक यादवले भदौको जेन्जी आन्दोलनको बेला फेसबुकमा हालेको एउटा स्ट्याटसको विषयलाई लिएर मेयर यादव, वडा नम्बर ८ का वडा अध्यक्ष बिन्देश्वर यादव र कार्यपालिका सदस्य सुनिल जैसवालको सहयोगमा निर्मम तरिकाले कुटपिट भएको बताए । फेसबुकमा कुनै नगरपालिका, मेयर, वडाअध्यक्षको नाम नलेखी राखेको स्ट्याटसका कारण बौद्धिमाइ नगरपालिकाका मेयर यादवले गालीगलौज गरी रस्सीले बाधेर कुटपिट गरेको उनले बताए । उनले भने, ‘मलाई बोलाएर आमा बहिनी दिदीलाई गाली गर्नुको साथै मारपिट गरे ।’
वैशाख २९ गते भएको घटनाको बिषयमा प्रहरीले कारबाही गर्न आनाकानी गरेपछि पीडितले सञ्चारकर्मीसँग पीडा पोखेर घटना सार्वजनिक भएको हो । घटना सार्वजनिक भएपछि जिल्लाका शिक्षक संघ संगठनहरूले सामूहिक रुपमा विज्ञप्ति जारी गर्दै जेष्ठ ५ गते भित्र घटनामा संलग्न मेयर र वडा अध्यक्षलाई कानूनी कारबाही नभए सडक संघर्षमा उत्रिने चेतावनी दिएका छन् ।
नेपाल शिक्षक संघ रौतहटका सचिव नागेन्द्र राय यादव, नेपाल राष्ट्रिय शिक्षक संगठन रौतहटका अध्यक्ष योगेन्द्र प्रसाद कुशवाहा, प्रगतिशील नेपाल राष्ट्रिय शिक्षक संगठनका अध्यक्ष धर्मेन्द्र प्रसाद सिंह, एकीकृत अखिल शिक्षक संगठनका अध्यक्ष बुनिलाल प्रसाद यादव, र नेपाल शिक्षक मञ्च रौतहटका अध्यक्ष शिव शंकर झाले विज्ञप्ति जारी गदैै अल्टिमेटम दिएका हुन् ।
