काठमाडौं । आईपीएलमा सबैभन्दा छिटो अर्धशतक बनाउने कीर्तिमान फेरि चर्चामा आएको छ । आइतबार चेन्नई सुपर किंग्सका युवा ब्याटर उर्भिल पटेलले केवल १३ बलमै अर्धशतक प्रहार गर्दै इतिहासकै सबैभन्दा छिटो ५० रन बनाउने खेलाडीको सूचीमा आफ्नो नाम दर्ज गराएका हुन् ।
लखनउविरुद्ध २०४ रनको विशाल लक्ष्य पछ्याउने क्रममा उर्भिलले २३ बलमा ६५ रनको विस्फोटक इनिङ खेले । उनले २ चौका र ८ छक्का प्रहार गर्दै १३ बलमै अर्धशतक पूरा गरेका थिए । यससँगै आईपीएल इतिहासका सबैभन्दा छिटो अर्धशतक बनाउने खेलाडीहरूको सूची फेरि चर्चामा आएको छ ।
आईपीएल इतिहासका सबैभन्दा कम बलमा पुरा भएका पाँच अर्धशतक
यशस्वी जैसवाल – १३ बल
सन् २०२३ मा राजस्थान रोयल्सका ओपनर यशस्वी जैसवालले कोलकाता नाइट राइडर्सविरुद्ध १३ बलमै अर्धशतक पूरा गरेका थिए । उनले ४७ बलमा अविजित ९८ रन बनाउँदा १२ चौका र ५ छक्का प्रहार गरेका थिए ।
उर्भिल पटेल – १३ बल
चेन्नई सुपर किंग्सका उर्भिल पटेलले लखनउविरुद्ध १३ बलमै अर्धशतक पूरा गर्दै जैसवालको कीर्तिमान बराबरी गरेका हुन् ।
केएल राहुल – १४ बल
सन् २०१८ मा केएल राहुलले दिल्ली क्यापिटल्सविरुद्ध १४ बलमै अर्धशतक बनाएका थिए। उनले १६ बलमा ५१ रन बनाउँदा ६ चौका र ४ छक्का प्रहार गरेका थिए ।
प्याट कमिन्स – १४ बल
सन् २०२२ मा कोलकाता नाइट राइडर्सका लागि खेल्दै प्याट कमिन्सले मुम्बई इन्डियन्सविरुद्ध १५ बलमा अविजित ५६ रन बनाएका थिए । उनले ४ चौका र ६ छक्का प्रहार गरेका थिए ।
रोमारियो शेफर्ड – १४ बल
गत सिजन रोयल च्यालेन्जर्स बैंग्लोरका लागि खेल्दै रोमारियो शेफर्डले चेन्नई सुपर किंग्सविरुद्ध १४ बलमै अर्धशतक प्रहार गरेका थिए । उनले अविजित ५३ रन बनाएर टोलीलाई २१३ रनको बलियो योगफलसम्म पु¥याएका थिए ।
