काठमाडौँ । भारतका लाखौं मानिस गर्मीका कारण हुने थकान र घातक स्ट्रोकको खतरामा रहेका छन् । भारतको मौसम विभागले हरियाणा, उत्तर प्रदेश, पश्चिम बंगाल, बिहार र उडिसामा लूको चेतावनी जारी गरेको छ । अघिल्ला वर्षहरूको भन्दा बढी गर्मी यसपालि हुने समभावना देखिएको छ । सन् २०२२ मा आएको लूका कारण धेरै मानिसहरू पीडामा परेका थिए साथै गहुँको विश्वव्यापी आपूर्तिमा असर परेको थियो । अहिले पोहोरको भन्दा बढी गर्मी हुने प्रक्षेपण गरिएको छ ।
तातोसँग आर्द्रता पनि मिसिएमा खतरनाक मात्र नभई सांघातिक समेत हुन पुग्छ । भारतको १.४ अर्ब जनसंख्यामध्ये अधिकांश घरबाहिर काम गर्ने गर्छन् । उनीहरूलाई गर्मीबाट सुरक्षाको उचित प्रबन्ध हुने गर्दैन । निर्माण क्षेत्रका मजदूर, ठेलामा सामान बेच्ने, रिक्सा तान्ने लगायतका मानिस प्रत्येक गर्मीमा मर्ने गरेका छन् । उनीहरूसँग गर्मी भगाउने साधनको अभाव छ । गर्मीका कारण मजदूर गुमाउनुपर्ने स्थिति भारतमा जति विकराल अन्य कुनै देशमा पनि छैन ।
गत आइतवार मात्र ११ जनाले शरीरमा पानीको अभाव तथा हीट स्ट्रोकका कारण ज्यान गुमाएका छन् । महाराष्ट्र सरकारले आयोजना गरेको एक कार्यक्रममा सहभागी हुने क्रममा घन्टौंसम्म चर्को घाममा बस्दा उनीहरूको मृत्यु भएको थियो । लगातार पानी पिइरहनका लागि स्वास्थ्य अधिकारीहरूले मानिसलाई सचेत गराइरहेका छन् । घाममा ननिस्कन, हलुका कपडा लगाउन, सूतीको खुकुलो कपडा लगाउन र टाउको छोप्न निर्देशन दिइएको छ ।
