काठमाडौं । राष्ट्रिय स्वतन्त्र पार्टीकी सांसद निशा डाँगीले नयाँ अभ्यास गर्दै खुला प्रतिस्पर्धाबाट स्वकीय सचिव छनोट गर्नु भएको छ । सांसदहरुले आफन्त र आसेपासेलाई स्वकीय सचिव बनाउने पुरानो अभ्यासलाई तोड्दै उहाँले भ्याकेन्सी खुलाउनु भएको थियो । गत चैत १६ गते निशाले एक साताको म्याद राखेर स्वकीय सचिवका लागि भ्याकेन्सी खुलाएकोमा ११६ जनाले आवेदन दिएका थिए । उनीहरूबाट पहिलो चरणमा ३५ जना छनोट भएका थिए भने १९ जनाले लिखित र मौखिक परीक्षा दिएका थिए ।
यसको नतिजा सांसद निशाले सामाजिक सञ्जालमा प्रकाशित गर्नु भएको छ । जसअनुसार पर्वतको राम्जा देउरालीकी सुश्मिता क्षेत्री स्वकीय सचिव बन्न सफल हुनु भएको छ । विराटनगरकी अपेक्षा सुवेदी र पोखराकी कविता आचार्य वैकल्पिकमा पर्नु भएको छ । उम्मेदवारहरूको लिखित, मौखिकसँगै कम्प्युटर टेस्टसमेत गरिएको थियो । शैक्षिक पृष्ठभूमि, कानुन र राजनीतिको ज्ञान तथा अनुभव, नेतृत्व गर्ने क्षमता, सिर्जनशिलता आदि हेरेर मूल्यांकन गरेको निशाले जनाउनु भएको छ । रास्वपाकी समानुपातिक सांसद निशा प्रतिनिधिसभाकी सबैभन्दा कान्छी सदस्यसमेत हुनुहुन्छ ।
