काठमाडौँ । भारतमा चार जना सैनिकको हत्या गरेको अभियोगमा एक सैनिक गिरफ्तार हुनु भएको छ । गत हप्ताको बुधबार पञ्जाव राज्यको भटिन्डा शहरको सैन्य क्याम्पभित्र बिहानै साढे ४ बजे गोलाबारी भएको थियो । सो घटनामा चार सैनिकले घटनास्थलमै ज्यान गुमाएका थिए । भटिन्डाका एसएसपी गुलनित सिंहका अनुसार चार सैनिकको हत्या अभियोगमा सोही क्याम्पका एक सैनिक गिरफ्तार हुनु भएको छ भने चार जवानलाई सोधपुछ गरेर छाडिएको छ । सेनाले नै सेनामाथि किन गोली चलाए भन्नेबारेमा हालसम्म केही खुल्न सकेको छैन ।
सो क्षेत्रका वरिष्ठ प्रहरी अधिकारी एसपीएस पार्मरले गत हप्ता नै भटिन्डाको सैन्य क्याम्पमा भएको आक्रमणमा कुनै पनि आतंकवादी संगठनको संलग्नता नभएको बताउनु भएको थियो । सेनाका अनुसार केही समयअगाडि मात्र २८ राउन्ड गोली क्षमताको एउटा अटोराइफल भटिन्डा सैन्य क्याम्पबाट हराएको थियो । सोही राइफलको प्रयोग गरेर आक्रमणकारीले सेनामाथि हमला गरेको अनुमान छ ।
