अप्सरा धमला, काठमाडौं । पूर्व श्रम मन्त्री एवं राष्ट्रिय स्वतन्त्र पार्टीका उपसभापति डोलप्रसाद अर्यालले अरुले देश बनाउन नजानेर राष्ट्रिय स्वतन्त्र पार्टी आउनु परेको बताउनु भएको छ । भारतको बैंगलोरमा भएको राष्ट्रिय स्वतन्त्र पार्टीको प्रवास नेपाली विभाग, भारत केन्द्रीय समिति घोषणा तथा नयाँ वर्षको शुभकामना आदानप्रदान कार्यक्रमलाई सम्बोधन गर्दै उहाँले यस्तो बताउनु भएको हो । उहाँले राष्ट्रिय स्वतन्त्र पार्टीले सधैँ जनताको आवाज बोल्ने गरेको पनि बताउँनु भयो ।
उहाँले शिक्षा दिन्छु स्वास्थ्य तथा रोजगारी दिन्छु भनेर अब राजनिती गर्ने दिन गएको बताउनु भएको छ । आप्रवासी नागरिकले पठाएको रकमले नेता पालिने गरेको र त्यो खाले संघियता सुधारिनु पर्ने उहाँको जिकिर छ । उहाँले राष्ट्रिय परिचय पत्रले विदेश जान मान्यता नपाएको मा पनि दुख व्यक्त गर्नु भएको छ । उहाँले भन्नु भएको छ, ‘हामी नेपालीले कतिवटा परिचय पत्र बनाउने अब परिचय पत्र बोक्न एउटा झोला नै बोक्नु पर्ने भयो ।’
अर्यालले देशमा धमिरा लागेको र धमिराले बच्चा समेत बनाएकाले तिनिहरुलाई नफालेसम्म देशको विकास नहुने बताउनु भयो । नेपालीहरुले नेपालीलाई नै दुख दिने गरेकाले एकले अर्कालाई सहयोग गर्न तथा देशमा ईमान्दार मान्छेको कमी भएकाले सबैलाई ईमान्दार बन्न पनि अपिल गर्नु भयो । उहाँले जसले देशलाई सहयोग गर्छ दुख पाएकालाई सहयोग गर्छ त्यो नै रास्वपा भएको दावि गर्नु भयो । रास्वपाका सांसदले सदनमा निरन्तर जनताको समस्यालाई बोल्ने गरेको र यसपालिको उप निर्वाचनमा पनि सानदार मतका साथ रास्वपा विजयी हुने विश्वास व्यक्त गर्नु भयो ।
उपसभापति अर्याल रास्वपामा आएपछि आप्रवासी नेपालीको कार्यक्रमलाई संबोधन गर्न पहिलो पटक भारत जानुभएको हो । उहाँले १ को बद्ला ३ र २० को बद्ला २२ लिएर जाने घोषणा पनि गर्नु भएको छ ।
