फाल्गुन ३,काठमाडौं । राष्ट्रिय स्वतन्त्र पार्टी (रास्वपा) आफ्नो चुनावी अभियानका क्रममा ‘मतदातासँग करार गर्ने’ नयाँ अभ्यासको थालनी गरेको छ । रास्वपाले गर्ने करार पत्र आज पार्टी सभापति रवि लामिछानेले सामाजिक सञ्जालबाट सार्वजनिक गरे ।
करार पत्रको प्रतिलिपि फेसबुकमा हाल्दै लामिछानेले लेखेका छन्, ‘चुनावमा बाचा त धेरैले धेरै पटक गरे । तर, पूरा नगरेको परिणाम उनीहरूले होइन, जनताले नै भोग्नुपर्यो निरन्तर । हामी पूरा नहुने वाचा होइन, जनतासँग प्रतिज्ञाको करार गर्दैछौं ।’
करार पत्रमा ऋणीको दस्तखत भनेर दुईवटा औँठाछापहरू राखिएका छन् । खासमा यो कसैको औलाको छाप भने होइन । करार पत्रमा लेखिएका अक्षरहरूलाई नै मसिना बनाएर औँठाछापको स्वरूपमा राखिएको हो ।
रास्वपा नेतृ प्रतिभा रावलका अनुसार देशभरका उम्मेदवारहरूलाई यो करार पत्र वितरण गरिने छ । उनीहरूले चाहेमा यो करार पत्रमा आफ्नो औँठाछाप पनि लगाउन सक्ने छन् । अहिले सार्वजनिक करार पत्र पार्टीको तर्फबाट हो । देशभरिका उम्मेदवारहरूले आ–आफ्नो स्थानीय मुद्दाहरूलाई समावेश गरेर अर्को करार पत्र पनि गर्नुपर्ने छ ।
