अप्सरा धमला, काठमाडौं । पूर्व श्रम मन्त्री एवं राष्ट्रिय स्वतन्त्र पार्टीका उपसभापति डोलप्रसाद अर्याल शनिबार हिजो भारत जानु भएको छ । भारतको बैंगलोरमा हुन लागेको राष्ट्रिय स्वतन्त्र पार्टीको प्रवासी नेपाली विभाग अन्तर्गतको कार्यक्रममा सहभागि हुन उहाँ भारत जानु भएको हो । उहाँले सामाजिक सञ्जालमा पोष्ट राख्दै यस बारे जानकारी दिनु भएको छ । साथै भारत जानका लागि राष्ट्रिय परिचय पत्र मान्य नभएको समेत उल्लेख गर्नु भएको छ ।
शनिबार दिउँसो १ः४५ मा नेपाल एयरलाइन्सको जहाजबाट भारत जान लाग्नु भएका अर्याल त्रिभुवन अन्तर्राष्ट्रिय विमानस्थलमा टिकट र राष्ट्रिय परिचय पत्र बोकेर चेकजाँचको लाइनमा बस्दा त्यहाँका कर्मचारीले उहाँलाई राष्ट्रिय परिचय पत्र मान्य नहुने बताउनु भयो । सो सुचना पछि निवासबाट नागरिकता ल्याएर भारत प्रस्थान गरेको कुरा पोष्टमा उल्लेख छ ।
उहाँले लेख्नु भएको छ, ‘भारतको बैंगलोरमा हुन लागेको राष्ट्रिय स्वतन्त्र पार्टीको प्रवासी नेपाली विभाग अन्तर्गतको कार्यक्रममा सहभागी हुन आज भारत जान लाग्दा, भारत यात्राको लागि राष्ट्रिय परिचयपत्र मान्य हुने विश्वासमा त्रिभुवन अन्तर्राष्ट्रिय विमानस्थल पुगे । त्यहाँ स्थित कर्मचारीले सो मान्य नहुने बताएपछि निवासबाट नागरिकता ल्याएर भारत प्रस्थान गरे । राष्ट्रिय परिचयपत्रको उपादेयता अन्य ठाउँमा होला र हुँदै पनि जाला । हाललाई चाहिँ भारत यात्राको निम्ति यसलाई मान्यता नदिएकोले आम जनता पनि यस विषयमा सुसूचित रहनू होला । ‘
उहाँले भारत यात्राको निम्ति पासपोर्ट वा नागरिकता नै अनिवार्य रहेको बारे सुसुचित हुन सबैलाई आग्रह समेत गर्नु भएको छ ।
