काठमाडाैं । आफ्ना सांसद ढाकाकुमार श्रेष्ठले दुर्गा प्रसाईसँग पैसा मागेको अडियो सार्वजनिक हुनासाथ रास्वपा सभापति रवि लामिछानेले कारवाही गरेर ऐतिहासिक निर्णय लिएको बताउनु भएको छ । तनहुँ १ मा रास्वपा उम्मेदवार स्वर्णिम वाग्लेको प्रचार कार्यक्रमलाई बिहीवार सम्बोधन गर्दै लामिछानेले इमानको राजनीतिलाई कुनै सम्झौता नगर्ने कडी बनाएको दाबी गर्नु भएको हो ।
‘कुनै प्रमाणित कुरा थिएन, जहाँ घुस लेनदेन भएको कही कतै प्रमाणित थिएन, घुसको लेनदेन भएको छैन, पैसाको कारोवार भएको छैन । तर, हाम्रा सांसदले कुनै अमुक व्यक्तिसँग मन्त्री बन्नका लागि डिल गरेको अडियो सार्वजनिक भएको हो । पैसाको डिल भएको हो वा होइन त्यसमा भन्न सकिने अवस्था थिएन । तर एउटा सार्वजनिक पद हासिल गरेको मान्छेले कुनै व्यक्तिसँग पैसा लेऊ भन्नु आफैमा नैतिकताको ठूलो संकट सोचेर हामीले ऐतिहासिक निर्णय गरेका छौं’, लामिछानेले भन्नु भयो ।
उहाँले पार्टी गठन भएको ९ महिनामै ७० वर्ष पुराना पार्टीले भन्दा बढी बार र तगारो बेहोर्नुपरेको पनि बताउनु भयो । मन्त्री बन्न व्यापारी दुर्गा प्रसाईंसँग २ करोड मागेको अडियो बाहिरिएपछि श्रेष्ठलाई रास्वपाले बुधवार पार्टीबाट निस्कासन गरेको छ ।
