काठमाडौँ । राष्ट्रिय स्वतन्त्र पार्टी (रास्वपा) ले आगामी फागुन २१ गते हुने प्रतिनिधिसभा सदस्य निर्वाचनका लागि प्रत्यक्षतर्फका उम्मेदवारका लागि आजदेखि आवेदन खुला गरेको छ। शुशीलाकुमारी कार्की नेतृत्वको सरकारले फागुन २१ मा चुनाव गर्ने म्यान्डेट पाएसँगै निर्वाचन तयारी देशभर तीव्र रूपमा अघि बढिरहेको छ। सबै दलहरू जस्तै रास्वपाले पनि चुनाव तयारीलाई तीव्रता दिएको छ।
रास्वपाले प्रत्यक्ष र समानुपातिक दुवै तर्फका उम्मेदवारका लागि छुट्टाछुट्टै आवेदन आह्वान गरेको छ। उम्मेदवार छनोट समितिका संयोजक विपीनकुमार आचार्यले सार्वजनिक गरेको सूचनामा योग्यता पुगेका इच्छुक पार्टी सदस्यले पार्टीको मोबाइल एपमार्फत आवेदन दिन सक्ने उल्लेख छ। प्रत्यक्ष तर्फ आवेदन शुल्क २५ हजार रुपैयाँ तोकिएको छ।
यसअघि समानुपातिक तर्फ उम्मेदवारका लागि ५० हजार रुपैयाँ शुल्क निर्धारण गरिएको थियो। तर आर्थिक रूपमा कमजोर सदस्यका लागि विशेष व्यवस्था मिलाइने र शुल्कमा छुट दिइने जनाइएको छ। पार्टीले मंसिर २२ गतेभित्र आवश्यक कागजातसहित आवेदन दिन आग्रह गरेको छ। समानुपातिक तर्फका आवेदकहरूको छनोटको अन्तिम निर्णय मंसिर २५ गतेभित्र हुने बताइएको छ।
रास्वपाले उम्मेदवार छनोटका लागि नयाँ मापदण्डसमेत लागू गरेको छ। २५ देखि ४० वर्ष उमेर समूहका युवालाई जनसंख्या अनुपातअनुसार समानुपातिक बन्दसूचीमा २७ प्रतिशत प्रतिनिधित्व सुनिश्चित गरिएको छ। त्यसैगरी, विदेशबाट फर्किएर उम्मेदवारी दिने नेपालीका लागि १० प्रतिशत प्रतिनिधित्व छुट्याइएको छ।
पार्टीले यसअघि समानुपातिक प्रणालीबाट सांसद बनेकालाई पुनः समानुपातिकतर्फ नउठाउने नीति पनि लागू गरेको छ।
आगामी फागुन २१ गते हुने प्रतिनिधिसभा निर्वाचनलाई लक्षित गर्दै रास्वपाले आन्तरिक प्रक्रियालाई छरितोसँग अघि बढाएको छ। शुल्कमा लचिलो नीति अपनाउँदा संगठनभित्र समावेशी सहभागिता बढ्ने र सबै पृष्ठभूमिका व्यक्तिलाई अवसर मिल्ने विश्वास पार्टीले व्यक्त गरेको छ।
