रास्वपा छाडेकी सुमाना श्रेष्ठलाई श्रम संस्कृति पार्टीमा आउन मेयर हर्क साम्पाङको आग्रह
राष्ट्रिय स्वतन्त्र पार्टी (रास्वपा) छाडेकी पूर्वमन्त्री सुमाना श्रेष्ठलाई श्रम संस्कृति पार्टीमा प्रवेश गर्न धरान उपमहानगरपालिकाका मेयर हर्क साम्पाङले खुलेर आग्रह गरेका छन्। साम्पाङले सामाजिक सञ्जालमार्फत सुमानालाई छिट्टै पार्टीमा प्रवेश गर्न आग्रह गर्दै ढिला गरे समयले पर्खदैन भन्ने टिप्पणीसमेत गरेका छन्। उनले सुमानालाई श्रम संस्कृतिमा स्वागत गर्ने मन भएको उल्लेख गर्दै आरम्भदेखि नै नयाँ प्रकारको काम गर्ने सोच भएका व्यक्तिहरूलाई आफ्नो पार्टीमा स्वागत छ भन्ने सन्देश दिएका छन्।
२०७९ को स्थानीय तह निर्वाचनमा स्वतन्त्र उम्मेदवारका रूपमा मेयर बनेपछि साम्पाङ पछिल्ला महिनाहरूमा सक्रिय रूपमा नयाँ राजनीतिक संरचना निर्माणतर्फ लागिरहेका छन्। आफ्नै दल दर्ता गराएपछि उनले विभिन्न क्षेत्रका व्यक्तिहरूलाई पार्टीमा ल्याउने प्रयास गर्दै आएका छन्। उनका अनुसार वैकल्पिक राजनीतिक शक्ति निर्माणका लागि बालेन, रवि र आफूहरू मिलेर अघि बढ्नुपर्ने जनताको अभिमत पनि बलियो भएको छ।
यसैबीच, सुमाना श्रेष्ठले रास्वपा छाडेपछि हालसम्म कुनै राजनीतिक दलमा औपचारिक प्रवेश गरेकी छैनन्। सुरुवातमा काठमाडौं महानगरका मेयर बालेन शाह र नेपाल विद्युत प्राधिकरणका पूर्वकार्यकारी निर्देशक कुलमान घिसिङसँग मिलेर नयाँ राजनीतिक पार्टी गठन गर्न सक्ने चर्चा चले पनि त्यसबारे कुनै ठोस निर्णय सार्वजनिक भएको छैन। तर उनको समुह भित्र केही तयारी भइरहेको स्रोतहरूले बताउँदै आएका छन्।
हालै सुमाना श्रेष्ठ र नेपाली कांग्रेसका महामन्त्री गगन थापा बीच भेटघाट भएको खबर बाहिरिएपछि उनको आगामी राजनीतिक दिशाबारे थप अनुमान बढेको छ। तर सुमानाले यसको कुनै औपचारिक पुष्टि गरेकी छैनन्।
श्रम संस्कृति पार्टीले सुमानालाई टार्गेट गर्दै खुलेर आह्वान गरेको यो पहिलो अवसर हो। आगामी राजनीतिक यात्रामा उनले कुन दिशातर्फ मोड लिन्छिन् भन्ने प्रतीक्षा राजनीतिमा सक्रिय सबै पक्षको छ।
