नेपाली कांग्रेसका सांसदहरू संसद पुनर्स्थापनाको पक्ष र विपक्षमा विभाजित हुन थालेका छन् । सांसदहरू दुई धारमा देखिएपछि कांग्रेसभित्र थप विवाद बढेको छ । विशेष महाधिवेशन कि नियमति महाधिवेशनमा सहमति नजुटेको बेलामा अचानक संसद पुनर्स्थापनाको मुद्दाले प्रवेश पाएको छ । त्यसमा मुख्य सचेतक नै सक्रिय भएपछि नेताहरूबीच एकअर्काप्रति आशंका पैदा भएको छ ।
नेकपा (एमाले)को एजेन्डामा सहमति हुने गरी हस्ताक्षर अभियान चलेपछि कांग्रेस सांसद मात्र होइन, नेताहरूमा पनि खैलाबैला भइरहेको छ ।
संसद पुनर्स्थापनाका लागि एमालेका अध्यक्ष केपी शर्मा ओलीले एमालेका सांसदहरूलाई हस्ताक्षर गर्न लगाएका थिए । एमालेले विघटित प्रतिनिधिसभाका सांसदहरूको बैठकसमेत बोलाएको छ ।
त्यही मेसोमा कांग्रेसभित्र हस्ताक्षर अभियान चलेको हो । त्यसले थप आशंका पैदा गरेको कांग्रेस नेताहरूले बताएका छन् । संसद पुनर्स्थापनाका लागि हस्ताक्षर अभियान चलाउन कांग्रेसका मुख्य सचेतक श्याम घिमिरे नै अग्रसर भएपछि झन खैलाबैला बढेको हो ।
कांग्रेसमा २८ असोजबाट केन्द्रीय कार्यसमिति बैठक जारी छ । बैठकले नियमित वा विशेष महाधिवेशन भन्ने नै टुंगो लगाउन सकेको छैन । २१ फागुनको चुनावमा सहभागी हुने वा नहुने भन्नेमा पनि दुईथरि मत देखिएको छ । केही नेताहरूले चुनावको मिति सार्नुपर्ने तर्क पनि गरेका छन् । अर्थात्, एकमत भएर कांग्रेस चुनावमा जाने भनेर भन्न सकिरहेको छैन । यही बेलामा कांग्रेसका सांसदहरू नै संसद पुनर्स्थापनाका लागि हस्ताक्षर गर्न थालेका हुन् । त्यो पनि एमाले सांसदहरूको अभियानकै बेलामा त्यसो गरिएको थियो ।
तर, कांग्रेसका सांसदहरूको उक्त हस्ताक्षर अभियानमा कार्यवाहक सभापति पूर्णबहादुर थापा, महामन्त्री गगनकुमार थापा र नेता शेखर कोइराला कसैलाई पत्तो थिएन । उनीहरूमध्ये कसैले अभियान चलाउन संकेत वा सन्देश दिएका पनि थिएनन् । त्यसो भए, कसको सन्देशमा हस्तक्षर अभियान सुरु भयो ? अहिले कांग्रेसभित्र निकै चासोको विषय बनेको छ । यही प्रकरणले खड्का र कोइरालाले एकअर्कालाई शकांको दृष्टिकोणले पनि हेर्न थालेका थिए । खड्कालाई कोइरालाले अभियान चलाएका हुन् भन्ने शंका थियो भने कोइरालालाई खड्काले भनेका हुन् । तर, दुवैलाई उक्त कुरा पत्तो थिएन । महामन्त्री थापा भने पहिलादेखि नै चुनावको पक्षमा भएकोले हस्ताक्षर अभियान चलाउन सन्देश दिने पक्षमा थिएनन् ।
कांग्रेस स्रोतका अनुसार अहिलेको हस्ताक्षर अभियान सिंगापुरबाट नेतृ डा. आरजु राणा देउवाको संकेतमा सुरु भएको हो । सभापति शेरबहादुर देउवापत्नी राणाले मुख्य सचेतक घिमिरेमार्फत अभियान चलाइएको हो ।
कांग्रेस नेताहरूको दाबीमा राणाको सन्देशमा सभापति देउवा स्वयम् संलग्न देखिएका छैनन् । शिलापात्रसँगको कुराकानीमा स्रोतले भन्यो, ‘सभापति देउवाले नै भनेको हो भने कार्यवाहक सभापतिमार्फत आउनुपर्ने थियो, आरजु राणानिकट श्याम घिमिरेबाट आएकोले त्यो आरजुको एक्लो निर्देशन हुन सक्ने सम्भावना देखिएको छ ।’
अभियानमा आशंका भएपछि खड्का र कोइरालाबीच भेट भएको थियो । खड्का र कोइराला दुवैले अभियान चलाएको होइन भन्ने भएपछि खड्काले मुख्य सचेतक घिमिरेलाई रोक्न निर्देशन दिएका थिए । घिमिरेले सार्वजनिक रुपमा कार्यवाहक सभापति रिसाएको टिप्पणी पनि गरेका छन् ।
घिमिरेसँगै चन्द्र भण्डारी पनि हस्ताक्षर अभियानमा सक्रिय देखिएका थिए । भण्डारी छोटो समयका लागि संसद पुनर्स्थापना गर्ने, तर प्रधानमन्त्री नफेर्ने योजनामा देखिएका छन् ।
कांग्रेस स्रोतका अनुसार ३२ जना सांसदले हस्ताक्षर गरेका थिए ।
