काठमाडौं। जेनजी पुस्ताले स्वस्फूर्त आह्वान गरेको आन्दोलनको पहिलो दिन भएको निर्मम दमन र १९ जनाको मृत्युपछि मुलुक अशान्तिको भुमरीमा फसिसकेको छ। दोस्रो दिन बिहानैदेखि देशैभरि प्रदर्शन, तोडफोड र आगजनीका घटनाहरू उग्र रूपले फैलिए। टोलटोलबाट निस्केका आन्दोलनकारीको मुख्य निशाना कांग्रेस, एमाले र माओवादीका शीर्ष नेतासहित मन्त्री तथा दलका कार्यालयहरू बनेका छन्।
यसैबीच प्रधानमन्त्री केपी शर्मा ओलीको निजी निवासदेखि लिएर प्रमुख नेताहरूका घरमा समेत आक्रमण र आगजनी भइसकेको पुष्टि भएको छ। केही क्षेत्रमा आन्दोलनकारीले रास्वपाको कार्यालयसमेत जलाएका छन्। काठमाडौं उपत्यकासहित देशका थुप्रै सहरहरूमा बिहानैदेखि कर्फ्यु घोषणा गरिएको थियो तर प्रदर्शनकारीले प्रशासनको आदेश खुलेआम उल्लंघन गर्दै ठूला जुलुस निकालेका छन्।
मध्यान्हसम्म आइपुग्दा सुरक्षाकर्मीहरूले अधिकांश क्षेत्रमा नियन्त्रण गुमाइसकेका छन्। नेपाल प्रहरी र सशस्त्र प्रहरी दुवै संरचना अब आन्दोलनकारीको भीडसँग जुध्न असमर्थ देखिएका छन्। कुनै पनि आधिकारिक निकायले औपचारिक प्रतिक्रिया दिन नसकेको अवस्था छ। यद्यपि, प्रधानमन्त्री ओलीले साँझ ६ बजे सर्वदलीय बैठक आह्वान गरेका छन्।
तर त्यतिन्जेलसम्म परिस्थिति सरकारको नियन्त्रणबाट पूर्णतया बाहिरिने संकेत प्रष्ट देखिएको छ। धेरै ठाउँमा प्रहरी आफैं पछाडि हटेका छन्, कारण :-निरन्तर दमन गर्दा फेरि हिजोजस्तै ठूलो मानवीय क्षति हुने भय। काठमाडौंसहित मुलुकका मुख्य सहरका राजमार्ग र सडक हाल आन्दोलनकारीकै कब्जामा छन्। नेपाली सेनाले आफूहरू आन्तरिक छलफलमा रहेको मात्र जानकारी दिएको छ, तर हस्तक्षेपबारे ठोस निर्णय अद्यापि लिएको छैन।
बौद्धिक र नागरिक समाजका आवाजहरू अब स्पष्ट छन् :-प्रधानमन्त्री ओलीले तत्काल राजीनामा दिएर राजनीतिक निकासको पहल नगरे मुलुक अझ गहिरो संकटतर्फ धकेलिने चेतावनी तीव्र हुँदै गएको छ। साँझ ६ बजेसम्म सुरक्षा निकायले आन्दोलन नियन्त्रण गर्न सक्ने सम्भावना न्यून देखिएको छ ।
