काठमाडौं। गृहमन्त्री रमेश लेखकको प्रत्यक्ष आदेशमा गृहमन्त्रालयले सात उपसचिवहरूको गुपचुप सरुवा गरेको खुलेको छ। अध्यागमन विभागमार्फत मानव तस्करीदेखि लिएर मन्त्रालयभित्रै कर्मचारी हेरफेरसम्मको आरोप खेपिरहेका गृहमन्त्री लेखक पछिल्लो समय फेरि विवादमा तानिएका छन्।
भिजिट भिसा प्रकरणमा रंगेहात परेका उनलाई मन्त्रालयभित्र आफ्नो मनोमानी चलाइरहेको भन्दै समेत आलोचना हुने गरेको छ। दुई तिहाइ सरकारको समर्थनमा ‘मेलामा छोडिएको साँढे’ झैँ आचरण देखाइरहेको भन्दै लेखकमाथि निरन्तर प्रश्न उठ्ने गरेको छ। यसअघि नै राष्ट्रिय स्वतन्त्र पार्टी रास्वपा र राष्ट्रिय प्रजातन्त्र पार्टी राप्रपाले उनको राजीनामाको माग गर्दै एक सय दिनभन्दा बढी समयदेखि संसद् अवरोध गर्दै आएका छन्।
गृहमन्त्रालयले पछिल्लो पटक गरेको कर्मचारी हेरफेरलाई पनि गोप्य राखिएको छ। अघिल्लो साता गरिएको सरुवा मन्त्रालयको आधिकारिक वेभसाइटमै प्रकाशित गरिएको छैन। शाखा अधिकृत र नायब सुब्बालाई हाजिर हुन २४ घण्टे चेतावनी दिने पत्रसमेत वेभसाइटमा राख्ने मन्त्रालयले उपसचिव सरुवाबारे भने एक सातासम्म जानकारी सार्वजनिक गरेको छैन।
मन्त्रालयको कर्मचारी प्रशासन शाखाबाट प्राप्त सूचीअनुसार सरुवा भएकामध्ये तीन जनालाई सहायक प्रमुख जिल्ला अधिकारी बनाएर पठाइएको छ भने अरूलाई विभिन्न विभाग तथा मन्त्रालयमा जिम्मेवारी दिइएको छ।
जिल्ला प्रशासन कार्यालय पर्साका सहायक प्रमुख जिल्ला अधिकारी बाबुलाल रेग्मीलाई कारागार कार्यालय पर्साको कारागार प्रशासक तोकिएको छ। त्यहाँका तत्कालीन कारागार प्रशासक खिमराज भुसाललाई मकवानपुरको सहायक प्रमुख जिल्ला अधिकारी बनाएर पठाइएको छ।
मकवानपुरका सहायक प्रमुख जिल्ला अधिकारी राजेन्द्र प्रसाद कँडेललाई इलाका प्रशासन कार्यालय सिमरा, बाराको प्रमुख बनाइएको छ भने त्यहाँका प्रमुख तेजराज शर्मालाई रामेछापको सहायक प्रमुख जिल्ला अधिकारी तोकिएको छ।
यस्तै, कारागार व्यवस्थापन विभागकी निर्देशक कल्पना घिमिरे नेपाललाई कसुरजन्य सम्पत्ति व्यवस्थापन विभागको निर्देशकको जिम्मेवारी दिइएको छ। गृह मन्त्रालयमा कार्यरत चोमेन्द्र न्यौपानेलाई कारागार व्यवस्थापन विभागमा निर्देशक बनाएर पठाइएको छ।
रामेछापका सहायक प्रमुख जिल्ला अधिकारी गंगाबहादुर क्षेत्रीलाई भने पर्वतको सहायक प्रमुख जिल्ला अधिकारी तोकिएको छ।
