काठमाडौं– अखिल नेपाल फुटबल संघ (एन्फा)को आयोजनामा नेपाल र बंगलादेशबीच अन्तर्राष्ट्रिय मैत्रीपूर्ण फुटबल हुँदैछ ।
काठमाडौंको दशरथ रंगशालामा भाद्र २१ गते शनिबार र भाद्र २४ गते मंगलबार नेपाल र बंगलादेशबीच अन्तर्राष्ट्रिय मैत्रीपूर्ण फुटबल हुन लागेको हो ।
मैत्रीपूर्ण फुटबल खेल्नका लागि बंगलादेशको टोली पनि नेपाल आइसकेको छ । दुवै खेलको बिजेतालाई ट्रफी र पदक प्रदान गरिने एन्फाले जनाएको छ । मैत्रीपूर्ण फुटबलका लागि आफूहरू तयार रहेको र जितका साथ ट्रफी आफ्नो पक्षमा पार्ने दुवै टोलीका कप्तान र मुख्य प्रशिक्षकले जनाएका छन् ।
मैत्रीपूर्ण फुटबलअघि शुक्रबार काठमाडौंमा आयोजित प्रि–म्याच कन्फ्रेन्समा नेपाली राष्ट्रिय फुटबल टोलीका कप्तान किरण चेम्जोङले मैत्रीपूर्णका लागि तयारी अवस्थामा रहेको र जित हासिल गर्ने बताए । घरेलु मैदानमा खेल हुने भएकाले पनि आफूहरू उत्साहित रहेको उनको भनाइ छ ।
नेपाल र बंगलादेशबीचको पहिलो मैत्रिपूर्ण खेल दशरथ रङ्गशालामा शनिबार साँझ साढे पाँच बजेदेखि सुरु हुनेछ । मैत्रीपूर्ण खेलका लागि भीआइपीतर्फको टिकट १ हजार र समान्य पारापिटतर्फको टिकट मूल्य ५ सय रुपैयाँ तोकिएको छ ।
