रामेछाप । रामेछापको मन्थली नगरपालिका–२, ५, ६ र ८ नम्बर वडाका १९ जना महिलालाई सिलाइ मेसिन वितरण गरिएको छ ।
मन्थली नगरपालिकाकी उपप्रमुख ईश्वरी बस्नेतको प्रमुख आतिथ्यतामा आयोजित कार्यक्रममा सामुदायिक विकास समाज (सिडिएस) ले ७२ दिने सीप विकास तालिम पूरा गरेका महिलालाई प्रति व्यक्ति १८ हजार रुपैयाँ बराबरको सिलाइ मेसिन हस्तान्तरण गरेको हो । सिडिएसका कार्यकारी निर्देशक मिलनकुमार घिसिङका अनुसार प्राविधिक तथा व्यावसायिक सीप र कृषि तालिममार्फत ग्रामीण भेगमा रोजगारी सिर्जना र उद्यमशीलता प्रवद्र्धन गर्ने उद्देश्यले यो कार्यक्रम सञ्चालन गरिएको हो । उनले भने, ‘ग्रामीण महिलाको सीप विकासमार्फत आर्थिक सबलीकरणमा योगदान पुगोस् भन्ने हेतुले सिलाइ मेसिन हस्तान्तरण गरिएको हो ।’
कार्यक्रममा उनले सिडिएसले चाइल्ड फण्ड नेटवर्कको सहयोगमा ग्रामीण क्षेत्रका महिला तथा युवालाई लक्षित गरी सीप विकासका विभिन्न कार्यक्रम सञ्चालन गर्दै आएको जानकारी दिए ।
सिलाइ मेसिन वितरण गर्दै मन्थली नगरपालिका उपप्रमुख बस्नेतले महिलालाई सिकेको सीपलाई व्यवहारमा उतारी आत्मनिर्भर बन्न आग्रह गरिन् । ‘सिप सिकेर त्यसलाई व्यवहारमा उतार्न सके आर्थिक सबलीकरण मात्र होइन, समाजमा उदाहरणीय भूमिका निर्वाह गर्न सकिन्छ,’ उनले भनिन् ।
नगरपालिकाले पनि महिला लक्षित सीप विकास कार्यक्रमलाई प्राथमिकतामा राख्दै आएको उनले बताइन् ।
