अप्सरा धमला, काठमाडौं । काठमाडौंको प्रमुख पर्यटकीय गन्तव्य मानिएको ठमेलमा पछिल्लो समय विदेशी पर्यटकको संख्या उल्लेख्य मात्रामा बढे पनि व्यापार भने बढ्न सकेको देखिदैन । नेपालमा मार्च महिनामा कोरोना महामारी पछिकै सबैभन्दा धेरै पर्यटक भित्रिएको तथ्याङ् सार्वजनिक भए पनि ठमेलमा भने उल्लेख्य मात्रामा व्यापार हुन नसकेको व्यवसायीले बताएका छन् । नेपाल आउने पर्यटकमध्ये ८० प्रतिशतभन्दा बढी ठमेल आउने गरेको भए पनि व्यापार भने खस्किएको हो।
कोरोना महामारी अघि निकै व्यापार हुने गरेकोमा अहिले पर्यटको आगमन भए पनि व्यापार नभएको व्यवसायीको गुनासो छ । खर्च धेरै गर्ने पर्यटक नआएका कारण व्यापार घटेको उनिहरुको बताउँछन् । ठमेलमा व्यापार व्यवसाय नहुँदा घरबेटीलाई भाडा तिर्नसमेत समस्या पर्दै गएको उनिहरुको भनाई छ ।
अंग्रेजी वर्षको मार्च, अप्रिल, मे महिनालाई नेपालमा पर्यटकीय यामका रुपमा लिने गरिन्छ। नेपाल पर्यटन बोर्डका अनुसार मार्च महिनामा मात्र नेपालमा ९९ हजार ४२६ पर्यटक भित्रिएका छन्। मार्च महिनामा सार्क राष्ट्रबाट ३३ हजार ४५४, अन्य एशियाली मुलुकबाट १५ हजार ६४३, युरोपबाट २३ हजार २६५ तथा अन्य राष्ट्रबाट तीन हजार ९५८ पर्यटक नेपाल आएका छन्। यस्तै, क्यानडाबाट एक हजार ७०७, अमेरिकाबाट नौ हजार ५५७ का साथै मध्यपूर्वलगायतका देशबाट १० हजार ३७५ पर्यटक नेपाल भित्रिएका छन्। मार्च महिनामा आउने पर्यटकमध्ये सबैभन्दा धेरै भारतबाट आएको तथ्याङ्कले देखाएको छ ।
