काठमाडौं । अस्ट्रेलियाका तीव्र गतिका बलर मिचेल स्टार्कले टी-२० अन्तर्राष्ट्रिय क्रिकेटबाट सन्यास लिएका छन् ।
स्टार्कले सन् २०२६ को अन्त्यबाट सुरु हुने अस्ट्रेलियाको व्यस्त टेस्ट तालिका र सन् २०२७ मा हुने एकदिवसीय विश्वकपलाई प्राथमिकता दिन यस्तो निर्णय लिएको बताएका छन् ।
टेस्ट क्रिकेट सधैं आफ्नो पहिलो प्राथमिकतामा रहेको बताएका उनले भने, ‘मैले अस्ट्रेलियाका लागि खेलेको हरेक टी-२० खेलको आनन्द लिएँ, विशेषगरी २०२१ को विश्वकप, त्यो केवल जितका कारण मात्र होइन त्यो बेलाको उत्कृष्ट टोली र रमाइलो वातावरणले पनि अविस्मरणीय छ ।’ उनले अगाडी भने, ‘भारतमा हुने टेस्ट भ्रमण, एशेज र २०२७ को एकदिवसीय विश्वकपलाई हेर्दा, यो निर्णयले मलाई यी ठूला प्रतियोगिताहरूका लागि ताजा र फिट रहन मद्दत गर्नेछ। साथै, यसले नयाँ बलिङ युनिटलाई अर्को टी-२० विश्वकपको तयारीका लागि समय पनि दिनेछ।’
३५ वर्षीय उनले आफ्नो टी-२० करियरमा ६५ अन्तर्राष्ट्रिय खेल खेल्दै ७९ विकेट लिए। उनी अस्ट्रेलियाका लागि टी-२० मा सर्वाधिक विकेट लिने दोस्रो बलर हुन्। उनले सन् २०२२ मा वेस्ट इन्डिजविरुद्ध उत्कृष्ट प्रदर्शन गरे । उनले उक्त खेलमा २० रन जोड्दै ४ विकेट लिए । स्टार्क सन् २०२१ मा यूएईमा टी-२० विश्वकप जित्ने अस्ट्रेलियाली टोलीका महत्त्वपूर्ण सदस्य थिए।
उनको अन्तिम टी-२० खेल सन् २०२४ मा क्यारेबियनमा भएको विश्वकप थियो।
सन् २०२६ को मध्यदेखि अस्ट्रेलियाले बंगलादेशविरुद्ध घरेलु शृंखला, दक्षिण अफ्रिका भ्रमण, न्युजिल्यान्डविरुद्ध चार टेस्ट, सन् २०२७ मा भारतमा पाँच टेस्ट र इंग्ल्यान्डविरुद्ध मेलबर्नमा १५०औँ वार्षिकोत्सवको अवसरमा हुने एक विशेष टेस्ट खेल्नेछ । यसबाहेक सन् २०२७ मा दक्षिण अफ्रिका, जिम्बाब्वे र नामिबियामा हुने एकदिवसीय विश्वकपमा अस्ट्रेलियाले आफ्नो उपाधि रक्षा गर्नेछ।
