अप्सरा धमला, काठमाडाैं । राष्ट्रिय स्वतन्त्र पार्टीका केन्द्रिय सभापति तथा पुर्व उपप्रधान तथा गृह मन्त्री रवि लामिछानेले सबैको प्रहार आफूमाथि रहे पनि विगतभन्दा मतान्तर बढाएर चुनाव जित्ने दाबी गर्नु भएको छ । आफ्नै केही कमजोरी र बाहिरको षडयन्त्रका कारण फेरी चुनाव लड्नुपरेको उहाँले बताउनु भयो । उहाँले अहिले चितवन क्षेत्र न २ बाट उमेद्वारी दिनु भएको छ । शुक्रवार कालिका नगरपालिकाको लामाचोकमा आयोजित कार्यक्रममा लामिछानेले चितवनका जनताको मन जितिसकेको र त्यसमा लालमोहर लगाउन उपनिर्वाचनमा होमिएको बताउनु भएको हो ।
‘यसअघि दिएको मतबाट ५ वर्ष काम गर्न पाइनँ, केही मेरै त्रुटि र षडयन्त्रका बीचमा उभिनुपरेको छ । सबैको प्रहार मलाइ भएको छ, झटारो त्यहीँ हानिन्छ, त्यही रुखमा झटारो हानिन्छ । यसपटक मलाई विश्वास छ, यसअघि भन्दा मतान्तर बढाउनु हुनेछ’, लामिछानेले भन्नु भयो । ठूला दलले आफ्ना कार्यकर्तालाई रास्वपाको कार्यक्रममा सहभागी नहुन निर्देशन दिइरहेको लामिछानेले बताउनु भयो ।
‘फेरि भोट खेर जान्छ भनेर तर्साउन खोजिएको छ, कसैलाई षडयन्त्रबाट होइन मतदानबाट हराउन सकिन्छ’,उहाँले भन्नु भयो । वैशाख १० गते हुने उपनिर्वाचनका लागि लामिछानेले प्रचार प्रसारको काम तीव्र बनाउनु भएको छ ।
