विराटनगर । कोशी प्रदेश सरकारका उद्योग, कृषि तथा सहकारी मन्त्री खगेनसिंह हाङ्गामले मन्त्रालयका सचिव शरणकुमार पाण्डेले प्रयोग गर्दै आएको सवारीको चाबी खोसेका छन् । मन्त्री हाङ्गामले आफूलाई असहयोग गरेको आरोप लगाउँदै सचिव पाण्डेको गाडीको चाबी चालकमार्फत नियन्त्रणमा लिएका हुन्।

Advertisement

सचिव पाण्डेले चाबी खोसिएको पुष्टि गरेका छन्। उनका अनुसार, मुख्यमन्त्री कार्यालयमा छलफलका लागि पुगेपछि, छलफल सकेर बाहिर निस्कँदा गाडी हराएको पाए। उनले आफ्नो सवारी चालकलाई फोन गर्दा फोन अफ थियो। पछि जानकारी लिँदा, मन्त्रीको निर्देशनमा चाबी खोसिएको थाहा भएको उनले जनाए।

गाडी नपाएपछि सचिव पाण्डे मोटरसाइकल मगाएर मन्त्रालय फर्किएको बताएका छन्। यस घटनाले मन्त्री र सचिवबीचको विवाद सतहमा ल्याएको छ भने, प्रदेश सरकारभित्रको प्रशासनिक समन्वयमा गम्भीर प्रश्न उठाएको छ।