काठमाडौँ । एसइई परीक्षामा मोरङबाट अहिलेसम्म २ सय विद्यार्थी पक्राउ परेका छन् । अनिवार्य सामाजिक विषयको परीक्षा हुँदै मोरङका ३ वटा परीक्षा केन्द्रबाट एकै दिन ठूलो संख्यामा नक्कली परीक्षार्थी पक्राउ परेका हुन ।
बुधवार ग्रामथानको सरस्वती माध्यमिक विद्यालयबाट एक जना नक्कली विद्यार्थीलाई पक्राउ गरेपछि जिल्ला शिक्षा समन्वय समितिले विद्यार्थीको प्रवेश पत्र चेक गर्ने योजना बनाएको थियो । जिल्ला समन्वयमा भएका सक्कली प्रवेश पत्र परीक्षा शुरू हुनुभन्दा अगाडि नै परीक्षा केन्द्रमा पुर्याइएको थियो । शिक्षा समन्वय र प्रहरीले विद्यार्थीसँग भएको प्रवेश पत्र र शिक्षा समन्वयबाट लगिएको सक्कली परिचय जुधाएर हेर्दा फोटो फरक परेपछि प्रहरीले जन्म मिति बुबा आमाको नाम सोधेको थियो। नाम फरक परेपछि नियन्त्रणमा लिएको मोरङ प्रहरीले जनाएको छ ।
प्रवेश पत्रमा नाम एउटै भए पनि फोटो भने नक्कली विद्यार्थीको राख्ने गरिएको पाइएको हो । कक्षा ८ पास गरेर विद्यालयको पढाइ छाडेका विद्यार्थीलाई पढ्ने मौका दिएर खुलामार्फत एसईईमा सहभागी गराइएको थियो ।यस्ता विद्यार्थीले परीक्षा फारमकन्सल्टेन्सीमार्फत भर्ने गरेको पाईएको हो । नक्कली विद्यार्थीलाई सोधपुछ गर्दा कन्सल्टेन्सीले परीक्षा लेख्न पठाएको भनेका छन् । एक जना विद्यार्थीबाट ४० हजारसम्म लिएर थोरै पैसा दिएर उनीहरूलाई परीक्षा लेखाउन लगाउने गरेको खुलेको छ ।
मोटो रकम कन्सल्टेन्सीले लिए पनि नक्कली विद्यार्थीलाई भने थोरै मात्रै पैसा दिने गरेको पाइएको छ । बिहीबार भएको परीक्षामा २ नक्कली विद्यार्थी भने फरार भएका छन् ।आजसम्म ५ वटा विषयमा परीक्षा सकिएको छ । अनिवार्य विषयका नेपाली, अंग्रेजी, गणित ,विज्ञान र सामाजिक विषयको परीक्षा ती नक्कली विद्यार्थीले दिईसकेका थिए। उनीहरूले लेखेका सबै विषयको परीक्षा रद्द गरिएको जिल्ला शिक्षा समन्वय इकाईले बताएबो छ ।
