काठमाडौं । पछिल्लो समय नेपाल एयरलाइन्स भित्र बेथितिका घटना बढ्दै गएपछि व्यवस्थापनले गल्ती गर्नेहरुलाई कारवाही गर्ने प्रतिवद्धता व्यक्त गरेको छ । नेपाल वायु सेवा निगमका बेथितिप्रति संस्कृति, पर्यटन तथा नागरिक उड्डयन मन्त्री सुदन किरातीले समेत असन्तुष्टी व्यक्त गर्नु भएको थियो । उहाँले भन्नु भएको थियो, ‘यी घटनाक्रमले मलाई निरास बनाएको छैन, बरु थप जिम्मेवार र समस्याप्रति अझ संवेदनशील बन्न प्रेरित गरेको छ, हामीलाई थाहा छ, रोग पुरानो हो, अब धेरै पिडा सहेर बस्न सक्ने स्थिति हामीलाई छैन ।’
निगमका प्रवक्ता रमेश पौडेलले बुधबार एक विज्ञप्ति जारी गर्दै भन्नु भएको छ, ‘अब उप्रान्त यस किसिमका घटना नदोहोर्याउन सम्बन्धित कर्मचारीलाई चेतावनी दिइएको छ, छानविनबाट प्राप्त कारण विश्लेषण गरी सुधारात्मक उपायको अवलम्बन एवम् गल्ती गर्नेहरुलाई कारवाही गरिने जानकारी गराइन्छ ।’
