काठमाडौँ । राष्ट्रिय स्वतन्त्र पार्टीका केन्द्रीय सभापति तथा पुर्व उपप्रधान तथा गृह मन्त्री रवि लामिछानेले ६ महिनामा २० सिट जितेको आँकडाअनुसार पाँच वर्षमा दुई तिहाइ मत ल्याएर एकल सरकार गठन गरिने दाबी गर्नु भएको छ। आगामी १० वैशाखको उपनिर्वाचनमा चितवन २ बाट रास्वपाका उम्मेदवार रहनु भएका लामिछानेले यस्तो दाबी गर्नु भएको हो ।
चितवन २ मा मत माग्न घरदैलो गरिरहनु भएका उहाले उपचुनाव हुन लागेका तीन वटै क्षेत्रमा रास्वपाले बाजी मार्ने बताउनु भयो। सर्वोच्च अदालतले नागरिकता विवादमा सांसद र मन्त्री पद खाइदिनुअघि सरकारमा बस्दा पनि प्रधानमन्त्री पुष्पकमल दाहाल प्रचण्ड, एमाले अध्यक्ष केपी ओली र कांग्रेस सभापति शेरबहादुर देउवाको सेवामा नलागेर जनताको काम गरेको उहाँको भनाइ छ। ३२ दिन सरकारमा बस्दा कामले गति लिँदै गरेका बेला आफूमाथि मुद्दाका चाङ थुपारेर असफल बनाउने प्रयास गरिएको रविले गुनासो गर्नुभयो।
