काठमाडौँ — सञ्चार तथा सूचना प्रविधिमन्त्री रेखा शर्माले विज्ञसँग छलफल गरी आमसञ्चार ऐनको तयारीमा जुटेको बताउनु भएको छ । सोमबार रेडियो नेपालको ७३ औं स्थापना दिवसको अवसरमा बोल्दै मन्त्री शर्माले उक्त कुरा बताउनु भएको हो ।
उहाँले सरकारी सञ्चारमाध्यम भजनमण्डली हुन नहुने भनेर सैद्धान्तिक मान्यताअनुसार प्रसारण ऐन संसदमा प्रस्तुत भएको बताउनु भयो । ‘सञ्चार विधेयक राष्ट्रियसभाको समितिमा पुगेर अन्तिम अवस्थामा छ । त्यसलाई हामीले प्रतिनिधिसभामा पुर्याउन खेज्दैछौं । हामीले भनेका छौं, सञ्चरमाध्यमहरु सरकारको तर्फबाट पनि सञ्चालन भइरहेको छ । तिनीहरु भजनमण्डली हुनुहुँदैन भनेका छौं,’ मन्त्री शर्माले भन्नु भयो, ‘भजनमण्डली हुनु हुँदैन भन्ने हाम्रो सैद्धान्तिक मान्यता अन्तर्गत अहिले प्रसारण ऐन जसरी हाम्रो संसद्मा गएको छ, त्यो प्रसारण ऐन पारित भइरहँदाखेरिमा रेडियो नेपाल, नेपाल टेलिभिजनका विषयमा त्यसले नयाँ एउटा वातावरण सिर्जना गर्छ ।’
सरकारले आमसञ्चार ऐन र मिडिया काउन्सिल ऐन पनि संसद्मा प्रस्तुत गर्ने तयारी गरिरहेको उहाको भनाई छ । उहाँले भन्नु भयो ‘हामीले आमसञ्चार ऐन, मिडिया काउन्सिल ऐन, थुप्रै कानुनहरु जुन हाम्रो अभाव छ, ती कानुनको तयारी हामीले मन्त्रालयमा विज्ञ साथीहरुसँग छलफल गरेर तयार गरिरहेका छौं । यी सबैमा हामी कानुनी रुपमा अघि बढ्न खोज्दैछौं । हामी अझै प्रभावकारी ढंगबाट अघि बढ्न जरुरी छ ।’ मन्त्री शर्माले जनतालाई सुसूचित बनाउने, जनतामाझ प्रभावकारी काम गर्ने वातावरण सिर्जना गर्ने कार्यक्रमहरु सञ्चारमाध्यमहरुले प्रसारण एवं प्रकाशन गर्न जरुरी रहेको बताउनु भयो ।
