काठमाडौँ । प्रधानमन्त्री पुष्पकमल दाहाल ‘प्रचण्ड’ ले त्रिवि शिक्षण अस्पतालमा उपचाररत राष्ट्रपति रामचन्द्र पौडेललाई भेट्नु भएको छ । प्रधानमन्त्रीको सचिवालयका अनुसार प्रधानमन्त्री प्रचण्ड आइतबार बिहान महाराजगञ्जस्थित अस्पतालमा पुगेर राष्ट्रपति पौडेलको स्वास्थ्य लाभको कामना गर्नु भएको हो ।

Advertisement

राष्ट्रपति रामचन्द्र पौडेल बिरामी भएपछि त्रिवि शिक्षण अस्पताल महाराजगञ्ज भर्ना गरिएको थियो । उहाँलाई पेट दुख्ने लगायत समस्या देखिएपछि शनिबार साँझ अस्पताल लगिएको थियो । अहिले उहाँको उपचार भइरहेको छ। राष्ट्रपति पौडेललाई चिकित्सकहरूको निगरानीमा राखिएको छ। पौडेल गत फागुन २५ गते राष्ट्रपतिमा निर्वाचित हुनु भएको थियो । त्यसलगत्तै उहाँको स्वास्थ्य परीक्षण समेत गरिएको थियो।