काठमाडौं। भिजिट भिसा प्रकरणको अनुसन्धानका लागि उच्चस्तरीय छानबिन आयोग गठन गर्नुपर्ने माग राख्दै विरोध गरिरहेको राष्ट्रिय स्वतन्त्र पार्टी (रास्वपा) र नेपाली कांग्रेस सांसदबीच प्रतिनिधिसभा बैठकमा आरोप–प्रत्यारोप र चर्काचर्की भएको छ।
आइतबारको बैठकमा रास्वपा सांसद डीपी अर्याल र कांग्रेस सांसद रामहरि खतिवडाबीच भीषण खण्डन–मण्डन भएको हो। आइतबार संसद सुरु भएपछि सभामुख देवराज घिमिरेले रास्वपा सांसद अर्याललाई बोल्न समय दिएका थिए। सांसद अर्यालले यसअघिको बैठकमा कांग्रेस सांसद रामहरि खतिवडाले झूटो आरोप लगाएको भन्दै घोर आपत्ति जनाए। सुमिरे टुर्स एन्ड ट्राभल्स आफ्नो कम्पनी भएको भन्दै अर्यालले एकजना मान्छे भिजिट भिसामा बाहिर गएर नफर्किएको प्रमाण दिन चुनौती दिए।
रामहरि खतिवडाले सुमिरे टुर एन्ड ट्राभल्सले विगत १० वर्षदेखि जापानमा नेपालीहरूलाई पठाउँदै आएको भनेर विषय उठाएका थिए। उनले “सुमिरे टुर एन्ड ट्राभल्स भन्ने कसको ट्राभल्स हो?” भन्दै प्रश्न उठाए। उनले भने— “विगत दश वर्षदेखि जापानमा भिजिट भिसाका नाममा हजारौँ मान्छे पठाएर अर्बौँ पैसा त्यहाँबाट लिएर संसदमा प्रतिनिधित्व गर्ने, सांसद किनेर पार्टीमा प्रवेश गर्ने र भिजिट भिसामा बदमासी गर्ने काम भएको छ।” यसबारे निष्पक्ष छानबिन भई कारबाहीको दायरामा आउनुपर्ने माग खतिवडाले राखे।
खतिवडाले उक्त आरोप लगाएपछि आगो बनेका रास्वपाका डिपी अर्याल आज जवाफ दिँदै संसदमा गर्जिए। आइतबार खतिवडालाई जवाफ दिँदै अर्यालले “सुमिरे टुर एन्ड ट्राभल्स मेरो कम्पनी हो” भनेर छाती पिटे। उनले आफू नेपालमै केही गरेर खाने मान्छे भएको, चोरेर खाने होइन भनेर प्रष्ट पारे। अर्यालले यसरी “चोरेर खाने मान्छे होइन” भन्नुको मतलब कांग्रेसलाई “चोर” भन्नु हो भन्ने अड्कल गर्न जो–कोहीले गर्न सक्थे ।
यति मात्र हैन,अर्यालले आफ्नो कम्पनिबाट भिजिट भिसामा गएकाहरू नेपाल नफर्किएको कुनै उदाहरण नरहेको स्पष्टिकरण दिए। उनले सिधै भिजिट भिसाको नाममा भइरहेको मानव तस्करीको विषय संसदमा ३२ दिनदेखि उठाइरहेको र सो विषयलाई विषयान्तरण गर्न अनावश्यक लाञ्छना लगाउने काम गरिएको आरोप लगाए। विषयान्तरण गराउने प्रयास अन्तर्गत निराधार आरोप लगाउने कार्य स्वीकार्य हुन नसक्ने भन्दै उनले चेतावनी पनि दिए।
उनले भिजिट भिसा प्रकरणमा रास्वपाको आन्दोलन जारी रहने भन्दै चुनौती पनि दिए। यसको बचाउ गर्दै रामहरि खतिवडाले “चोरको खुट्टा काटा भने चोर तर्सियो” भन्दै रास्वपालाई आरोप लगाए । उनले आफूले कसैको नाम नतोकेको स्पष्ट पार्दै रास्वपा आगो हुनुपर्ने कारण नरहेको समेत उल्लेख गरे।
अन्तत: के अर्यालले सुमिरे टुर एन्ड ट्राभल्समार्फत दश वर्षदेखि जापानमा भिजिट भिसाका नाममा हजारौँ मान्छे पठाएर अर्बौँ रकम लुट्दै आएका हुन्? साँच्चै कांग्रेस डराएर भिजिट भिसा प्रकरणलाई बिषयान्तर गर्न खोजेको हो? किन यसरी संसदमा कांग्रेस र रास्वपाबीच “तँ चोर – तँ चोर” को भाष्य सिर्जना भयो ?? यसरी आरोप–प्रत्यारोप,खण्डन–मण्डनका बीच रास्वपालाई अर्को चुनौती थपिएको छ ।
