काठमाडौँ । नेकपा एमालेका अध्यक्ष केपी शर्मा ओलीले माओवादी टालाटुली भएको अभिव्यक्ति दिनु भएको छ । उहाँले आज काठमाडौंमा आयोजित एक कार्यक्रममा बोल्दै एमाले काङ्ग्रेस सिङ्गो थानको लुगा भएकोले कोट सिलाउन मिल्ने र माओवादि टालाटुलि भएकाले जोड्दा नराम्रो देखिने भन्दै माओवादीलाई व्यङ्ग्य गर्नु भएको हो । यस्तै उहांँले प्रधानमन्त्री पुष्पकमल दाहाल प्रचण्डलाई भौगोलिक अखण्डता र सीमा अतिक्रमणको विषयमा बोल्न पनि सुझाव दिनु भएको छ । निकट भविष्यमा प्रधानमन्त्री प्रचण्ड भारत भ्रमणमा जान लागेको भन्दै ओलीले यस विषयमा खुलेर कुरा गर्न सुझाव दिनु भएको हो । उहाँले भन्नुभयो, ‘सरकारले कमसेकम जमिनको बारेमा, हाम्रो भौगोलिक अखण्डताको बारेमा बोल्नुपर्छ । प्रधानमन्त्रीले बोल्नुस् हाम्रो भूमि के भइरहेको छ । कहाँ कहाँ के भएको छ खुलस्त भन्नुस् ।’
ओलीले फेरी थप्नु भयो, ‘विदेश भ्रमणमा जाँदै हुनुहुन्छ, त्यहाँ बोल्न सक्ने त उहाँको खुबी नै छैन । आफ्नो जमिनको दाबेदारीको कुरा गर्न जाँदै हुनुहुन्छ कि अरु नै कुरा ? प्रश्न दाबेदारी कि ताबेदारीको भन्ने हो ।’नेपालको राष्ट्रिय स्वाधिनता र स्वतन्त्रता कमजोर स्थितिमा पुगेको उहाँले बताउनु भयो । तर सरकार यसबारे चुप रहेको उहाँको आरोप छ । ‘हाम्रो भूमि खुम्चिँदो छ, हाम्रो सीमा मिचिँदो छ, सरकार मौन छ । किनभने यसमा बोल्यो भने सरकार धरापमा पर्न सक्दछ,’ ओलीले भन्नु भयो । आफ्नो पद खतरामा पर्छ भनेर बोल्न डराउनेले देशको पक्षमा पनि काम गर्न नसक्ने उहाँको भनाइ छ ।
चुनावमा समेत बाहिरबाट कसले ‘सपोर्ट’ गर्छ उसैले जित्छ भनेर चर्चा चल्ने गरेको भन्दै ओलीले अभ्यास आन्तरिक हुने भए पनि हिसाब बेग्लै हुने गरेको टिप्पणी गर्नु भएको छ ।
