काठमाडौँ। गत चैत १५ गतेको राजावादी प्रदर्शनका क्रममा गाडीभित्रबाट दुर्गा प्रसाईंले ‘आओ, आओ’ भन्दै गरेको भिडिओ खिच्ने युट्युबर प्रकाशचन्द्र दाहालविरुद्ध आपराधिक उपद्रव र संगठित अपराधको अभियोगमा मुद्दा लगाईएको छ। सरकारी वकिल कार्यालय काठमाडौंले आइतबार जिल्ला अदालतमा अभियोगपत्र दायर गर्दै दाहाललाई दुई फरक मुद्दामा सजाय माग गरेको हो ।
‘नेपाल पुकार’ नामक युट्युब च्यानलका सञ्चालक दाहाल दुर्गा प्रसाईंले गाडी चलाउँदै आफ्ना समर्थकलाई बोलाइरहँदा त्यही गाडीमा बसेर आफ्नो युट्युब च्यानलमा लाइभस्ट्रिम गरिरहेका थिए । अहिले उक्त च्यानलमा उक्त भिडिओ प्राइभेट गरिएको छ ।
दाहालले आपराधिक समूह/संगठनसँग मिलेमतो गरी राज्य संस्था र संवैधानिक संरचना पल्टाउने उद्देश्यले भएको घोषणा सभामा उपस्थित भई आपराधिक उपद्रव गरेको अभियोगपत्रमा दाबी गरिएको छ ।
चैत १५ गतेको प्रदर्शनमा आन्दोलनका कमान्डर दुर्गा प्रसाईं प्रहरीको सुरक्षा घेरा तोड्ने प्रयास गर्दै तीनकुनेबाट बानेश्वरस्थित संसद् भवनतर्फ जाँदै गर्दा सोही क्रममा गाडीमै सवार प्रकाशचन्द्र दाहालले प्रसाईंले ‘आओ, आओ’ भन्दै भिडलाई आफूतिर बोलाइरहेको दृश्य खिचेका थिए ।
