काठमाडौँ । काठमाडौँ महानगरपालिकाका प्रमुख बालेन्द्र शाहको चिपफेक भिडियो प्रयोग गरी नेपालमा अबैध मानिने अनलाइन जुवा प्लेटफर्मको प्रचार गरिएको पाइएको छ । ‘आईबेट ९७ नेपाल’ नामक अनलाइन जुवा प्लेटफर्मले शाहको भिडियोलाई दुरुपयोग गर्दै अवैध प्रचार गरेको हो ।
कलाकार सन्दीप क्षेत्रीले सञ्चालन गर्ने ‘ह्वाट द फ्लप’ कार्यक्रममा अतिथि बनेका शाहको वास्तविक भिडिओलाई तोडमोड गरी अनलाइन जुवाको प्रचारमा प्रयोग गरिएको देखिन्छ।
उक्त डिपफेक भिडियोमा प्रस्तोता क्षेत्रीले शाहलाई ‘फुर्सदको समयमा के गर्नुहुन्छ ?’ भनेर सोधेको देखाइएको छ । जवाफमा शाहले भने जस्तै गरी, “फुर्सदमा रमाइलो गर्छु। आईबेट ९७ मा स्लट खेल्छु । रमाइलो पनि हुन्छ,” भन्दै गरेको आवाज र दृश्य मिलाइएको छ।
उक्त सट्टेबाजी प्लेटफर्मले आफ्नो सञ्जाल टेलिग्राममार्फत पनि विस्तार गरिरहेको खुलेको छ । सामाजिक सञ्जाल फेसबुकमा अपलोड गरिएको उक्त भिडिओमा यो सामग्री तयार पार्दासम्म १० हजार बढी रियाक्सन, १६५ कमेन्ट र नौ लाख बढी भ्युज आएको छ ।
यस प्लेटफर्मले जित्न सजिलो हुने, बोनस पाइने र रकम सजिलै निकाल्न सकिने जस्ता भ्रामक दाबी गर्दै प्रचार गरिरहेको छ । साथै अनलाइनमा खुलेआम बेटिङ र लाइभ क्यासिनोको प्रचार गरेको पाइएको छ । त्यसबाहेक उक्त प्लेटफर्मले आफू नेपालमा आधिकारिक रूपमा दर्ता भएको भन्दै नक्कली दर्ता कागजात समेत प्रस्तुत गरेको छ ।
