काठमाडौं। गृहमन्त्री रमेश लेखकले कुनै पनि धर्मलाई आफ्नो राजनीतिक स्वार्थ पूरा गर्न, असहिष्णु, अराजक र अपराधजन्य कार्यमा प्रयोग गर्न नहुने बताएका छन् । आज प्रतिनिधिसभाको बैठकमा बोल्दै गृहमन्त्री लेखकले धार्मिक आवरणमा आपराधिक गतिबिधि गर्न नहुने बताएक हुन् ।
उनले भने,‘धर्म व्यक्तिको आस्था र विश्वास हो । विभिन्न धर्मप्रति आस्था र विश्वास हुन्छ । मैले मेरो आस्था र विश्वासको अभिव्यक्ति गर्न पाउँछु । त्यसको अर्थ अरु धर्महरू कम उत्कृष्ट छन्, नराम्रा छन् भन्ने होइन् । हाम्रो धार्मिक सहिष्णुता र मेलमिलाप हाम्रो परम्परा पनि हो । हाम्रो सबै धर्महरू एकअर्काप्रति सम्मान गर्ने र अर्कोको धर्ममा अवरोध नगर्ने हाम्रो परम्परा हो र त्यसै अनुसार जानुपर्छ भन्ने पक्षमा छौं ।’
कुनै हिंसात्मक घटनालाई धर्मको आवरणमा राखेर उन्मुक्ति नपाइने बताए । उनले तीनकुने घटनामा भएको आगजनी र हिंसा अपराधकर्म भएकाले कुनै धर्म वा आस्थासँग जोडेर हेर्न नमिल्ने बताए । उनले तीनकुनेमा राजतन्त्रको वकालतमा भएको विषय नेपालको संविधानविपरीत रहेको पनि बताए । उनले घटनामा संलग्नहरूलाई पक्राउ गरेर कारवाहीको प्रक्रियामा ल्याउन अनुसन्धान भइरहेको पनि बताए ।
