काठमाडौं। काठमाडौं महानगरपालिकाले प्रवक्तामा नवीन मानन्धर उही नै रहेको बताएको छ । महानगरका प्रमुख बालेन्द्र साह (बालेन) ले कार्यपालिकाअन्तर्गत ४ वटा समितिका संयोजकहरू फेरे पनि प्रवक्ता यथावत नै रहेका बालेनको सचिवालयले जनाएको हो ।
जसमा सूचना प्रविधि समिति संयोजक नवीन मान्नधरलाई हटाएर बालेनले वीरेन्द्र प्रजापतीलाई जिम्मेवारी दिएका थिए। महानगरमा सामान्यत: सूचना प्रविधि समिति संयोजक नै प्रवक्ता हुने परम्परा छ ।
उक्त समितिको संयोजक फेरिँदा प्रवक्ता फेरिएको चर्चा चलेको थियो । तर, महानगरले प्रवक्तामा मानन्धर यथावत रहेको बताएको छ । महानगरका सहायक प्रवक्ता ध्रव काफ्लेले मानन्धरलाई सूचना प्रविधि समिति संयोजकको जिम्मेवारीबाट हटाइएको तर, प्रवक्ता यथावत रहेको बताए । उहाँ (मानन्धर) महानगरको प्रवक्तामा उहाँ नै हो’ तर ‘सूचना प्रविधि समितिमा वीरेन्द्र प्रजापती आउनु भएको छ ।’उनले भने ।
बालेनले सुशासन समितिमा ख्यामराज तिवारीलाई हटाएर दलबहादुर कार्कीलाई जिम्मेवारी दिएका छन् । सम्पदा तथा पर्यटन समितिबाट आशामान संगतलाई हटाएर विनोद कुमार राजभण्डारीलाई ल्याएका छन् ।
‘काठमाडौँ महानगरपालिका, नगर कार्यपालिका (कार्य सम्पादन) नियमावली २०७४ को नियम १५ बमोजिम गठन भएको समितिका संयोजकको जिम्मेवारी फिर्ता गरेर उपनियम (१) बमोजिम नयाँ संयोजक तोकिएको छ’, महानगरले पत्रमा लेखिएको छ ।
बालेनका प्रेस संयोजक सुरेन्द्र बजगाईंका अनुसार ३ वर्ष पुगेकाले जिम्मेवारी फेरिएको हो । ‘तीन वर्षसम्म उहाँहरूको काम हेरियो’, बजगाईंले भने, ‘नयाँलाई पनि मौका दिन जिम्मेवारी फेरिएको हो ।’
