काठमाडौं । राष्ट्रिय प्रजातन्त्र पार्टी नेपालका अध्यक्ष कमल थापा राप्रपा कार्यालय पुगेका छन् । तीन वर्ष ७ महिनापछि थापा राप्रपा पार्टी कार्यालय धुम्बाराही फर्केका हुन् ।
उनले राप्रपा अध्यक्ष राजेन्द्र लिङ्देनसँग भेट गरेका छन् । भेटपछि समसामयिक विषयमा छलफल भएको बताइएको छ । केही समय यता थापा र लिङ्देन नजिकिएका छन् । थापा धुम्बाराही पुगेको तस्बिर सेयर गर्दै लिङ्देनले आजको तस्बिर भन्दै आफूसहित थापाको फोटो राखेका थिए ।
एउटै लक्ष्य र गन्तव्य बोकेर हिँडिरहे पनि राजावादी हस्ति नेताहरू एक ठाउँमा उभिन सकिरहेका थिएनन् । लिङदेन र थापाबीच त झन् पानी बाराबारकै अवस्था थियो । राप्रपालाई नै फुटाएर थापाले राप्रपा नेपाल गठन गरेको हुँदा यी दुई पार्टीबीच तिक्तताको अवस्था कायम थियो ।
वैशाख १५ को राप्रपा नेपालको विरोध सभामा कमल थापाको निम्तो मान्न लिङदेन पुगेपछि यी दुई नेताको सम्बन्धमा ‘ब्रेक थ्रू’ भएको हो ।
