काठमाडौं – राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर (ज्ञानेन्द्र) शाहीले वैदेशिक रोजगारीमा गएका नेपाली श्रमिकहरूको हकहितको संरक्षण गर्न श्रम, रोजगार तथा सामाजिक सुरक्षा मन्त्रालय असफल रहेको आरोप लगाएका छन्।
काठमाडौं। आइतबार प्रतिनिधिसभाको बैठकमा बोल्दै सांसद शाहीले नेपालको समग्र अर्थतन्त्र रेमिट्यान्स (वैदेशिक विप्रेषण) मा निर्भर भए पनि सरकारले श्रमिकहरूको योगदानको कदर नगरेको गुनासो गरे।
“सांसद, प्रधानमन्त्री, मन्त्री र कर्मचारीको तलब र भत्ता नै रेमिट्यान्सबाट चलेको छ,” उनले भने, “हामीले नुनको सोझो गर्नु पर्दैन?”
शाहीका अनुसार वैदेशिक रोजगारीका नाममा अझै लाखौँ नेपाली दलालहरूको जालोमा फसेका छन्। “लाखौँ नेपाली नागरिकहरू दलालको ठगीमा परेर घरवारविहीन भएका छन्,” उनले भने, “श्रम मन्त्रालय झन्डा देखाउन बस्ने ठाउँ हो कि जनताको पीडामा मल्हम लगाउने निकाय?”
यदि श्रम मन्त्रालयले जनताका लागि काम गर्न नसक्ने हो भने त्यस्तो मन्त्रालयको औचित्यमै प्रश्न उठ्ने उनको तर्क थियो।
सांसद शाहीले परराष्ट्र मन्त्रालयमाथि पनि तीव्र आलोचना गरे। वैदेशिक रोजगारीमा गएका नेपालीहरू संकटमा परेपछि उद्धार र कूटनीतिक पहलमा मन्त्रालय चुकेको उनको आरोप छ।
“नेपालीहरू अझै पनि विदेशमा अलपत्र छन्,” उनले भने, “तर परराष्ट्र मन्त्रालयले कुनै कूटनीतिक पहल गरेको देखिन्न। जहाँ गए पनि नेपाली मर्नुपर्ने अवस्था किन सिर्जना हुन्छ?”
शाहीले सभामुखको ध्यानाकर्षण गराउँदै सरकार र सम्बन्धित मन्त्रालयहरूलाई वैदेशिक रोजगारीमा गएका नागरिकहरूको सुरक्षा, सम्मान र न्याय सुनिश्चित गर्न आग्रह गरेका छन् ।
