काठमाडौं । गृहमन्त्री रमेश लेखकले नागरिक उन्मुक्ति पार्टीका संरक्षक रेशमलाल चौधरी अनधिकृत पत्रको आधारमा पक्राउ परेकोप्रति दु:ख व्यक्त गरेका छन्। प्रतिनिधि सभामा सभामुखको निर्देशनपछि जवाफ दिँदै गृहमन्त्री लेखकले यो घटनाले चौधरी, उनको परिवार र दललाई असहजता पारेको बताए।
उनका अनुसार वैशाख १७ गते सर्वोच्च अदालतका एक अधिकृत महिमानसिंह विष्ट ‘परिचयपत्रसहित’ प्रहरी महानिरीक्षकको कार्यालय पुगेका थिए र फैसला कार्यान्वयनको जानकारी गराएका थिए। सोही आधारमा अदालतको आदेश कार्यान्वयन गर्ने मनसायले चौधरी पक्राउ परेको उनले दाबी गरे।
गृहमन्त्री लेखकले भने, “अनधिकृत पत्रबाट पक्राउ भइ डिल्लीबजार कारागार चलान भएसँगै उत्पन्न असहज स्थितिप्रति म दु:ख व्यक्त गर्दछु।” उनले कानुन कार्यान्वयनमा त्रुटि नहोस् भनेर आफूले प्रहरीले सचेत गराइसकेको जानकारी दिए। “यस्ता घटना दोहोरिन नदिन मैले प्रहरीलाई सजग र सचेत गराएको छु,” उनले संसदमा भने।
उक्त पत्र अनधिकृत रहेको पुष्टि भएसँगै सो पत्र लिई पुगेका अधिकृत विष्टमाथि कीर्ते र झुट्टा जानकारी दिएको अभियोगमा म्याद थप गरी अनुसन्धान भइरहेको पनि गृहमन्त्रीले जानकारी दिए।
उल्लेखनीय छ, वैशाख १७ गते जनमत पार्टी र नागरिक उन्मुक्ति पार्टीबीच एकता घोषणा गर्न आयोजित कार्यक्रमका क्रममा चौधरीलाई प्रहरीले कमलादीबाट पक्राउ गरेको थियो। पाँच घण्टा पछि सर्वोच्च अदालतको औपचारिक पत्र आएपछि उनलाई रिहा गरिएको थियो।
