काठमाडौं । एक युट्युब च्यानलमा दिएको अभिव्यक्तिका कारण अहिले सामाजिक सञ्जालमा गजलकार सुमन स्मारिकाले साइबर बुलिङको सामना गर्नु परिरहेको छ । केही दिन अघि सार्वजनिक पोडकास्टमा विवाहको सन्दर्भमा दिएको धारणाले गर्दा साइबर बुलिङको सिकार भएकी हुन् ।
उनले उक्त पोडकास्टमा भनेकी थिइन्, ‘विवाह मेरो प्राथमिकतामा छैन । जीवनमा अरू धेरै उद्देश्यहरू छन् । यद्यपि आमा चाहिँ बन्छु । तर, विवाह गरेर होइन । अहिले प्रविधिले हामीलाई यस्तो राम्रो सुविधा दिइरहेको छ । त्यो अवसरको फाइदा उठाउँछु नि म !’
स्मारिकाले आईभीएफ प्रविधिको सहयोगले विवाह नगरे पनि आमा बन्न सकिने सम्भावनातर्फ इंगित गरेकी थिइन् । तर, उनको यस्तो भनाइप्रति विमति राख्दै सञ्जाल प्रयोगकर्ताले उनीमाथि गाली गर्ने र लाञ्छना लगाउने काम गरिरहेपछि उनले निरन्तर जसो स्पष्टीकरण दिइरहेकी छन् । कतिपय स्पष्टीकरण सञ्जालमा लेख्दै, डिलेट गर्दै गरिरहेकी छन् । ‘अब म मर्नुपर्ने हो ?’ भन्दै लेखिएका उनका स्टाटसहरु अहिले गायब छन् ।
उनले दुई दिनअघि मात्रै अर्को एक स्पष्टीकरण दिएकी थिइन् । त्यहाँ उनले लेखेकी थिइन्, ‘मलाई बारम्बार आक्रमण गर्न बन्द गर्नुहोस् ।’ उनले थप लेखेकी थिइन्, ‘तपाईंहरुसँग मप्रति कुनै शत्रुता छ भने मसँग सीधै कुरा गर्नुहोस्, म तयार छु । तर, महिलामाथि महिलाहरू नै हाबी हुन बन्द गर्नुहोस् । म तपाईँहरूको अनावश्यक ज्यादती सहन यहाँसम्म आइपुगेको होइन । र म अब कसैको कुनै प्रकारको दुर्व्यवहार सहनेवाला छैन ।’
स्मारिका युवापुस्तामाझ लोकप्रिय गजलकार हुन् । उनी सुदूरपश्चिम टिकापुरबाट गजल लेखनमा भविष्य खोज्दै काठमाडौं आएर स्थापित भएकी गजलकार हुन् । ‘होलटाइकर’ गजलकारको परिचय बनाएकी स्मारिकाको मुख्य आय श्रोतमध्ये गजलका कार्यक्रमहरू पनि हुन् । उनका दर्जनौँ गजलहरू चर्चित छन् ।
