काठमाडौँ – सरकारले बाढीपहिरोमा परी गम्भीर घाइते भएकाहरुको निशुल्क उपचार गर्ने व्यवस्था मिलाउने निर्णय गरेको छ । प्रधानमन्त्री केपी शर्मा ओली अमेरिकाबाट फर्के लगत्तै हिजो साँझ बसेको मन्त्रिपरिषद्को आकस्मिक बैठकले घाइतेहरुको निशुल्क उपचार गर्ने निर्णय गरेको हो ।
यस्तै बैठकले ज्यान गुमाएकाको परिवारलाई जनही २ लाख रुपैयाँ राहत दिने निर्णय गरेको छ । प्राकृतिक विपद्का कारण १० दिनसम्म बेपत्ता रहेका सदस्यलाई पनि मृतककै रूपमा मानेर परिवारलाई २ लाख दिने निर्णय गरेको हो ।
यसैगरी दैवीप्रकोप राहत कोषमा सरकारको तर्फबाट अर्थ मन्त्रालयले एक अर्व रुपैयाँ राख्ने र मन्त्री परिषद्को सबै सदस्यहरुले एक महिनाको तलव दिने समेत निर्णय गरेको छ । यस्तै सरकारले ३ दिन राष्ट्रिय शोक मनाउने निर्णय गरेको सञ्चार तथा सूचना प्रविधि मन्त्री पृथ्वी सुब्बा गुरुङले जानकारी दिए । यस्तै राष्ट्रिय झण्डा आधा झुकाउने पनि बैठकले निर्णय गरेको छ ।
