काठमाडौं – मनकामना केबलकार आज (मंगलबार) देखि सञ्चालनमा आएको छ । २६ वर्षपछि आधुनिक प्रविधिमा केबलकार सञ्चालनमा आएको हो । गतअसार ३१ बाट सेवा बन्द गरेर ‘एनलग अप्रेटिङ सिस्टम’ बाट ‘डिजिटल डि–कनेक्ट सिस्टम’ मा रुपान्तरण गरिएसँगै पुनः सञ्चालन गरिएको हो ।
डोप्लेमेयर अस्ट्रियाबाट आएको इन्जिनियर तथा प्राविधिक टोलीको सुपरीवेक्षणमा केबलकारलाई आधुनिक प्रविधिमा स्तरोन्नति गरिएको मनकामना केबलकारका निर्देशक राजेशबाबु श्रेष्ठले बताउनुभयो । नयाँ–नयाँ प्रणालीको विकास भइरहेको र त्यहीअनुसार यसलाई पनि डिजिटल प्रणालीमा लगिएको उहाँले सुनाउनुभयो ।
पहिला एसी करेन्ट आएर त्यसलाई बीसीमा कन्भर्ट गरी डीसी मोटरले गियर बक्स चलाउँथ्यो ,’ भन्नुभयो, ‘अहिले सिधै एसी मोटरबाट चलाउन मिल्ने भएको छ । पूरै कन्ट्रोल सिस्टम एनलगबाट डिजिटल बनाइएको छ । मुख्य कन्ट्रोल प्यानल सबै परिवर्तन गरिएको छ ।’ दुई वर्षअघि पहिलो चरणअन्तर्गत प्राविधिक टोलीले परीक्षण गरेर मेकानिकल ‘वेयर एन्ड टिएर’ भएका महत्त्वपूर्ण मेकानिकल पार्ट परिवर्तन गरिएको थियो ।
त्यो बेला १५ दिन केबलकार बन्द गरेर काम गरिएको थियो । सबैभन्दा महत्त्वपूर्ण पार्ट्स केबलकारमा गोन्डोला झुन्डिने ग्रीप हो रहेको त्यो दुई वर्षअघि नै परिवर्तन गरिएको उहाँले सुनाउनुभयो ।
