रामेछापको दोरम्बा शैलुङ गाउँपालिका वडा नम्बर ३ लेखर्कमा पहिरो खस्दा ठूलो मानविय तथा भौतिक क्षति भएको छ भने म्याग्दीको बेनीबजार आसपासको क्षेत्र बाढीबाट ठूलो क्षति भएको बारे दुखद खबर छ ।
शैलुङको पहिरोमा १० जना हराएकामा ६ जनाको शव फेला परेको छ । ४ जना अझै बेपत्ता छन् । शनिबार राति अविरल वर्षापश्चात् लेखर्कमा ११ः४५ बजेतिर आएको पहिरोले पाँच घर पूर्णरूपमा बगाएको प्रमुख जिल्ला अधिकारी अनिता निरौलाले जानकारी दिइन् ।
थप पाँच घर क्षतिग्रस्त अवस्थामा छन् । ३० घरधुरी रहेको उक्त बस्ती नै जोखिममा परेको निरौलाको भनाइ छ । पहिरोमा परी ज्यान गुमाएकाहरूको पहिचान खुलेको छ । प्रहरीका अनुसार ३० वर्षीया चण्डीका थापा मगर, उनका १८ महिनाका छोरा आमस थापामगर रहेका छन् ।
यस्तै ४० वर्षीया उर्मिला पहरी, १७ वर्षका सन्दीप, १८ वर्षका विज्ञान र १४ वर्षका सन्तोष पहरी रहेका छन् । उनीहरू एकै परिवारका हुन् । यस्तै, ७५ वर्षीया फड्की पहरी, ५५ वर्षका काले पहरी, ५४ वर्षीया, झ्याउकिरी पहरी, र २३ वर्षीया बिन्दा पहरी बेपत्ता छन् ।
१० वर्षीया अञ्जना पहरीको उद्धार गरिएको छ। घटनास्थल गाउँपालिकाको केन्द्रबाट पनि दुई घन्टाको दूरीमा भएकाले द्धारलाई नै पहिलो प्राथमिकतामा राखेर घटनास्थलमा सुरक्षाकर्मी परिचालन गरिसकिएको निरौलाले बताएकी छन् ।
उनले एक जना बालकको उद्धार गरिएको पनि जानकारी दिइन् । लेदोसहितको पहिराले ढोइगाउँ खोलाको पुलसमेत बगाएको छ । गत वर्षमात्रै निर्माण सम्पन्न भएको उक्त पुल करिब ३ करोड लागतमा तयार भएको हो ।
बाढीले पक्की पुल नै बगाउँदा पहिरोमा बेपत्ता भएकाहरुको उद्धारमा समस्या भएको छ । दोरम्बा–शैलुङ गाउँपालिका २ र ३ जोड्ने पक्की पुल गएराति बाढीले बगाएको जिल्ला प्रहरी कार्यालय रामेछापले जनाएको छ ।
यता गएराति ठूलो पानी पर्दा म्याग्दीको बेनीबजार आसपासको क्षेत्र बाढीबाट प्रभावित भएको छ । बाढीले एउटा जीप बगाएको छ भने विद्यालय, ज्येष्ठ नागरिक आश्रमको भवन, सडकलगायत भौतिक संरचनामा क्षति भएको छ ।
जिल्ला प्रहरी कार्यालय म्याग्दीका अनुसार पोखराबाट बेनीका लागि छुटेको ग२च ९३५५ नम्बरको जिपलाई बागलुङ–बेनी सडकअन्तर्गत बेनी नगरपालिका–१ हुलाकेको खोल्साको बाढीले बगाएको छ ।
यात्रु र चालकले भागेर ज्यान जोगाएका छन् । सशस्त्र प्रहरी बल गुल्म गलेश्वरका प्रहरी नायब उपरीक्षक नवराज नेपालकाअनुसार बेनी–जोमसोम सडकमा पहिरो खसेपछि खोल्सा र नालीको पानी बस्तीतर्फ सोझिँदा एउटा विद्यालय तथा ज्येष्ठ नागरिक आश्रमको भवनमा क्षति भएको छ ।
बेनी नगरपालिका–९ मा रहेको जडभरत संस्कृत माध्यमिक विद्यालयको पाँचकोठे भवनको कक्षाकोठाभित्र बाढी पसेर पुरिएको छ ।
