काठमाण्डौ – अमेरिकी राष्ट्रपतिका लागि डेमोक्र्याटिक उम्मेदवार कमला ह्यारिसले मिनेसोटाका गभर्नर टिम वाल्जलाई आफ्नो उपराष्ट्रपति उम्मेदबारका रूपमा रोजेकी छिन् । यद्यपि औपचारिक घोषणा भने भइसकेको छैन। वाल्जलाई छनोट भएकोबारे सूचित गरिसकिएको छ भने उनले प्रस्तावलाई स्वीकार गरिसकेका छन् ।
उदार नीतिहरूका कारण चर्चामा आएका ६० बर्षीय वाल्जको उम्मेदबारीले अमेरिकाको मध्यपश्चिम क्षेत्रमा स्पटलाइट बदलेको छ। वाल्ज एक पूर्व शिक्षाविद्, संसद सदस्य र आर्मी नेशनल गार्डमा सेवा गरेका व्यक्ति समेत हुन् । ह्यारिस र वाल्ज आज फिलाडेल्फियामा आफ्नो पहिलो संयुक्त कार्यक्रममा सँगै देखा पर्नेछन् ।
गभर्नरको रूपमा वाल्जको कार्यकारी अनुभव र भुक्तान बिदा, बन्दुक नियन्त्रण, प्रजनन अधिकार, र निशुल्क विद्यालय खाजा लगायतमा नीतिगत अडानहरुका कारण ह्यारिसले उनलाई उपराष्ट्रपति उम्मेदबार छान्न चाहेकी थिइन् । वाल्जलाई मध्यपश्चिमी ब्याटलग्राउण्ड राज्यहरूमा मतदाताहरूलाई अपील गर्ने एक सशक्त उम्मेदबारका रुपमा हेरिएको छ ।
क्यापिटल हिलमा वाल्जको चयनको लागि व्यापक उत्साह देखिएको छ। किनभने वाल्जलाई प्रगतिशील नीतिहरूको च्याम्पियनको रूपमा हेरिन्छ । संसदमा हुँदा वाल्जले २००७ देखि २०१९ सम्म मिनेसोटाको पहिलो कंग्रेसनल डिस्ट्रिक्टको प्रतिनिधित्व गरेका थिए । सन् २०१६ मा डोनाल्ड ट्रम्पले १५ अंकले जिल्ला जित्दा पनि उनले संसदमा चुनाव जितेका थिए ।
