काठमाडौँ – प्रधानमन्त्री पुष्पकमल दाहालले बालकुमारी घट्नामा दोषी देखिएको भन्दै भौतिक पूर्वाधार तथा यातायातमन्त्री प्रकाश ज्वालालाई पद मुक्त गर्ने तयारी गरेका छन् ।
मन्त्री ज्वाला बालकुमारी घट्नामा दोषी देखिएको भनेर छानबिन समितिको प्रतिवेदन आउँदापनि प्रधानमन्त्रीले किन बर्खास्त नगरेको भनेर विषय संसद्मा समेत प्रवेश गरेपछि प्रधानमन्त्री दाहालले यस्तो तयारी गरेका हुन् ।
सांसदहरुसँगको हिजो (आइतबार) को प्रश्नोत्तर कार्यक्रममा समेत प्रधानमन्त्री दाहालले छानबिन समितिको प्रतिवेदन बुझेपछि आवश्यक कारबाही गर्छु भनेर प्रतिबद्धता जनाएका थिए ।
समितिले उपप्रधान एवम् गृहमन्त्री नारायणकाजी श्रेष्ठलाई बुझाएको प्रतिवेदन हिजोको क्याविनेटमा प्रधानमन्त्रीले बुझिसकेका छन् । प्रधानमन्त्री दाहालले मन्त्री ज्वालालाई राजीनामा दिन भनिसकेका छन् ।
ज्वालाले छानबिन समितिको प्रतिवेदन आफूले पनि पाउनुपर्ने अडान लिएका छन् । आफ्नो पार्टीका मन्त्रीलाई हटाउन लागिएको भन्दै एकीकृत समाजवादीका अध्यक्ष माधवकुमार नेपाल प्रधानमन्त्री दाहालसँग रुष्ट छन् । रास्वपा, एमालेदेखि माओवादी केन्द्रका सांसदहरुले समेत मन्त्री ज्वालाको राजीनामा मागिसकेका छन् ।
